Գյումրիի «Շիրակի» իվուարցի հարձակվող Մորի Կոնեն Հայաստանի առաջնությունում իր առաջին իսկ մրցաշրջանում բավականին տպավորիչ ելույթներ է ունենում. ժպտադեմ «դահիճը», չխնայելով մրցակիցներին, գրեթե ամեն խաղում մեկը մյուսից գեղեցիկ գոլեր է հեղինակում ու միանձնյա գլխավորում է ԲԽ-ի ընթացիկ առաջնության ռմբարկուների ցանկը՝ խփած 21 գոլով:
Իվուարցի գոլահարն ArmSport-ի հետ զրույցում նշում է՝ ինքը «Շիրակ» է եկել որպես Կոտ-դ՛Իվուարի առաջնության լավագույն ռմբարկու ու պարտավոր է արդարացնել սպասելիքները.
«Ինձ համար մեծագույն հաճույք կլինի իմ առաջին մրցաշրջանում Հայաստանի առաջնության լավագույն ռմբարկու դառնալը: Ի՞նչն է ինձ ավելի արդյունավետ դարձնում. կարծում եմ՝ մարզչիս ու թիմակիցներիս վստահությունը իմ հանդեպ: Երբ եկա «Շիրակ», տպավորվեցի այն վերաբերմունքով, որ նրանք ցույց տվեցին ինձ: Ի պատասխան՝ պետք է ապացուցեմ, որ նրանք իմ հարցում չեն սխալվել: Ես այստեղ եմ եկել որպես Կոտ-դ՛Իվուարի առաջնության լավագույն ռմբարկու ու պետք է համապատասխանեմ այդ դերին»,- ասում է 24-ամյա ֆուտբոլիստը:
Հայաստանի Բարձրագույն խմբի առաջնության ավարտից 3 տուր առաջ չեմպիոնական պայքարը սրվել է. մրցաշարային աղյուսակում երկիշխանություն է, բայց Կոնեի խոսքով՝ «Շիրակի» համար չեմպիոնական հույսերը մեծ են.
«Հիանալի հաղթանակ տարանք «Արարատի» նկատմամբ ու շատ ուրախ եմ, որ ես էլ կարողացա երկու գոլ խփել: Ինչպես միշտ, սա հնարավոր եղավ բարձր կենտրոնացման, բոլոր խաղերին լրջորեն վերաբերվելու և ոչ մի թիմին չանտեսելու շնորհիվ: Կարծում եմ՝ ամեն ինչ հնարավոր է, ու չեմպիոն դառնալու հավանականությունը հիմա ավելի մեծ է»,- ասում է Կոնեն:
Իվուարցու խոսքով, մնացած 3 խաղերին «Շիրակը» մոտենալու է որպես եզրափակչի.
«Առաջնության ավարտին ընդամենը 3 տուր է մնացել ու վստահ եմ՝ բոլոր հանդիպումներն էլ շատ դժվար կլինեն մեզ համար: Ինչ վերաբերում է թիմի տրամադրվածությանը, ապա պետք է նշեմ, որ ամեն ինչ շատ հանգիստ է: Փլեյ-օֆֆ-ի մեկնարկից ի վեր մեր առջև խնդիր էր դրված յուրաքանչյուր խաղին մոտենալ որպես եզրափակիչ ու հիմա էլ կշարունակենք նույն կերպ: Մնացած 3 խաղերը կանցկացնենք եզրափակչի պես ու ամեն ինչ կանենք դրանք հաղթելու համար:
Իմ առաջնային նպատակը «Շիրակի» կազմում Հայաստանի չեմպիոն դառնալն է: Մենք լավ թիմ ունենք ու միանշանակ կարող ենք հասնել մեր նպատակին»,- ասում է Կոնեն:
Իսկ արդյոք Կոնեի ապագա ծրագրերը և՞ս «Շիրակի» հետ են կապված.
«Ես «Շիրակի» ֆուտբոլիստ եմ, ունեմ պայմանագիր ակումբի հետ ու այս պահին մտածում եմ միայն այս ակումբի մասին: Ինձ շատ լավ եմ զգում «Շիրակում», Գյումրիում ու շատ ուրախ եմ, որ խաղում եմ այս քաղաքի համար»:
Ասում է՝ քաղաքում այնքան էլ հաճախ չի լինում: Եթե մարզման չէ, ապա հիմնականում տանն է, տարբեր երկրների առաջնություններն է դիտում կամ երաժշտություն լսում: Իսկ «Շիրակում» հարմարվելու առումով որևէ դժվարություն չի ունեցել.
«Բավականին տեղեկացված էի ակումբի մասին, քանի որ «Շիրակում» արդեն իսկ իվուարցի ֆուտբոլիստներ կային, ու խոսել էի նրանց հետ: Նախքան այստեղ գալս՝ նաև մտերիմ էի Մուսա Բակայոկոյի հետ, ինչն ավելի հեշտացրեց իմ գործը: Թիմում բոլորին շատ եմ սիրում, բայց ամենից շատ մտերիմ եմ Ավո Լեյբ Ջունիորի, Սոլոմոն Ուդոյի և մեր ակումբի թարգմանիչ Հարութի հետ»,- խոստովանում է Կոնեն:
Նախքան «Շիրակին» միանալը՝ 24-ամյա ֆուտբոլիստը կարճ ժամանակ փորձաշրջան է անցել լատվիական «Դաուգավպիլս» ակումբում, որի կազմում 5 հանդիպման է մասնակցել.
«Շիրակն» իմ խաղին հետևում էր, երբ դեռ հանդես էի գալիս Կոտ-դ՛Իվուարի առաջնությունում, նրանք կապ էին հաստատել իմ գործակալի հետ նախքան իմ՝ Լատվիա մեկնելը: «Դաուգավպիլսում» մոտ 1 ամիս անցկացրի, բայց արդեն հստակ առաջարկ ունեի «Շիրակից» ու որոշեցի միանալ այս թիմին, ինչի համար շատ ուրախ եմ»,- պատմում է Կոնեն ու նշում, որ պրոֆեսիոնալ կարիերան սկսել է 2010 թվականին Կոտ-դ՛Իվուարդում, այնուհետև 9 տարի խաղացել է իր երկրի առաջնություններում՝ առաջին ու երկրորդ դիվիզիոնների թիմերում:
Հիշեցնենք՝ 25-րդ տուրից հետո «Շիրակն» ու «Արարատ-Արմենիան» 45-ական միավորով գլխավորում են Հայաստանի առաջնության մրցաշարային աղյուսակը: Մնացած տուրերը Գյումրիի թիմը նախ կխաղա «Լոռիի» հետ, ապա հյուրընկալվելիս կմրցի «Նոայի» հետ, իսկ վերջին տուրում Գյումրիում ուժերը կչափի «Ալաշկերտի» հետ:
Նարե Հովհաննիսյան
Լուսանկարները՝ ArmSport-ի և ՀՖՖ-ի
