«Բարսելոնայի» և Իսպանիայի հավաքականի նախկին պաշտպան Ժերար Պիկեն հերթական անգամ աչքի է ընկել սոցիալական ցանցերում՝ կոշտ և հեգնական արձագանքով լռեցնելով «Ռեալի» երկրպագուներից մեկին։
TikTok-ում օգտատերերից մեկը, ակնարկելով մրցավարների կողմնակալությունը, գրել էր. «Կա միայն մեկ ճանապարհ, որպեսզի «Բարսան» հաղթի, և մենք բոլորս գիտենք այն»։ Մադրիդյան ակումբի հասցեին իր սկանդալային արտահայտություններով հայտնի Պիկեն բաց չի թողել առիթն ու տեսաուղերձով հակադարձել է.
«Այո՛, կա հաղթելու միայն մեկ ճանապարհ, և դա գեղեցիկ ֆուտբոլ խաղալն է։ Հենց դրանով ենք մենք ճանաչված ամբողջ աշխարհում։ Մենք նվաճել ենք բազմաթիվ Լա լիգաների ու Չեմպիոնների լիգաների գավաթներ, տրեբլներ ենք ձևակերպել՝ ցուցադրելով փայլուն խաղ։ Դուք միշտ շահարկում եք մրցավարների թեման, բայց կարող եմ հիշեցնել «Յուվենտուսի» դեմ Չեմպիոնների լիգայի եզրափակիչը, որտեղ Միյատովիչի գոլն անօրինական էր»։
Նախկին պաշտպանը դրանով չի սահմանափակվել ու հիշատակել է նաև մադրիդյան դերբիներից մեկը. «Կամ հիշենք Սերխիո Ռամոսի գոլը «Ատլետիկոյի» դեմ. այն խփվել էր խաղից դուրս վիճակից և նույնպես անօրինական էր։ Մրցավարական սխալներ միշտ էլ լինում են, բայց պատմականորեն դրանք միշտ մի փոքր ավելի շատ «Ռեալի» օգտին են եղել»։
Խոսքի վերջում իսպանացին չի դավաճանել իր ֆիրմային հեգնանքին. «Մնացած առումով, հուսով եմ՝ լավ ես։ Ամուր գրկում եմ, վայելիր օրդ»,- Պիկեի խոսքն է մեջբերում Mundo Deportivo-ն։
