Կամերունի ֆուտբոլի ֆեդերացիայի նախագահ Սամուել Էտո’Օ-ն խոսել է աֆրիկյան և եվրոպական ֆուտբոլային կառույցների միջև առկա ֆինանսական և գաղափարական հսկայական անջրպետի մասին՝ նշելով, որ եվրոպական ասոցիացիաներն ի վիճակի չեն ընկալելու Աֆրիկայում տիրող իրական խնդիրները։
«Մենք երբեք նույն կերպ չենք նայի իրերին։ Եթե նայենք որոշ ֆեդերացիաների, որոնք ունեն ընդամենը 150 հազար եվրո բյուջե, ինչպե՞ս կարող են նրանք մրցակցել գերտերությունների հետ։ Ոչ ոք չի հարցնում, թե ինչպես է աֆրիկյան ֆեդերացիաների ղեկավարներին հաջողվում կառավարել ֆուտբոլն իրենց երկրներում։
Իսկ երբ տեղի է ունենում տաղանդների արտահոսք, մեղքը բարդում են մեզ վրա։ Եթե Կամերունը տարեկան 20 կամ 40 միլիոն դոլար բյուջեի հույս ունենար, վստահաբար, մենք կունենայինք մեր սեփական Մբապեն ու Չուամենին (երկու ֆուտբոլիստներն էլ ունեն կամերունյան արմատներ – խմբ․ Armsport.am): Այդ դեպքում մենք շատ ավելի լավ կկազմակերպեինք մեր ֆուտբոլը»,- Էտո’Օ-ի խոսքերն է մեջբերում RMC Sport-ը։
Հիշեցնենք, որ հուլիսի վերջին հայտնի էր դարձել աշխարհի առաջնության հեռարձակման իրավունքների վաճառքի համար ՖԻՖԱ-ի նոր առևտրային կառույցի՝ FIFA Forward Enterprise-ի (FFE) ստեղծման ծրագրերի մասին: Ավելի ուշ, ֆուտբոլային կոնֆեդերացիաների քննադատության և ՈւԵՖԱ-ի անդամ երկրների կողմից Մունդիալը բոյկոտելու սպառնալիքի ֆոնին, Ջանի Ինֆանտինոն ստիպված եղավ հրաժարվել այդ գաղափարից: Այս միջադեպից հետո եվրոպական որոշ ֆեդերացիաներ հետ կանչեցին Ինֆանտինոյի թեկնածությանն աջակցությունը՝ 2027 թվականի մարտին կայանալիք ՖԻՖԱ-ի նախագահական ընտրություններում։
