«Կրասնոդարի» նախկին կիսապաշտպան, իսկ այժմ մանկապատանեկան ակադեմիայի մարզիչ Ալեքսանդր Չուգունովը Euro-Football.Ru-ի հետ զրույցում գնահատել է Հայաստանի ազգային հավաքականի առաջատար Էդուարդ Սպերցյանի՝ սաուդյան «Ալ-Ահլի» տեղափոխությունը և խոսել դրա դրական կողմերի մասին։
Ըստ փորձագետի՝ 26-ամյա կիսապաշտպանի հեռանալը լուրջ հարված է ռուսական ակումբի համար, և նրան փոխարինող գտնելը հեշտ գործ չի լինելու.
«Կարծում եմ՝ «Կրասնոդարի» համար Սպերցյանի կորուստը դժվար լրացվող է: Լեգեոներների շրջանում հեշտ չի լինի նրան համարժեք փոխարինող գտնել: Սպերցյանը և՛ ռուսախոս է, և՛ անհրաժեշտ մենթալիտետ ունի: Նա թիմի հիմնական կրեատիվ խաղացողն էր, ով կարող էր և՛ փոխանցում կատարել, և՛ շրջանցել մրցակցին, և՛ գոլ խփել, և՛ հիանալի իրացնել տուգանային հարվածները»:
Չուգունովը համոզված է, որ Սաուդյան Արաբիա տեղափոխվելը ֆուտբոլիստի կողմից ճիշտ և խելամիտ քայլ էր, քանի որ այնտեղ նա ակնհայտ ֆիզիկական առավելություն կունենա.
«Այն, որ Սպերցյանը մեկնեց հենց Սաուդյան Արաբիա, իմ կարծիքով, ճիշտ որոշում էր։ Այնտեղ խաղում են մեծ աստղեր, բայց նրանց կարիերան արդեն մայրամուտում է, իսկ Սպերցյանը դեռ լի է ուժերով, շարժունակ է և գտնվում է ֆուտբոլային ամենահասուն տարիքում: Կարծում եմ՝ նա այնտեղ պետք է խաղա, օգուտ տա թիմին և հաճույք ստանա ֆուտբոլից: Բնականաբար, նաև լավ կվաստակի։ Հուսանք, որ «Կրասնոդարի» փորձառու սելեկցիոն բաժինը կգտնի հարձակման գծում նոր առանցքային ֆուտբոլիստի, ով շատ բան կստեղծի առջևում»։
Հիշեցնենք, որ Ռուսաստանի Պրեմիեր լիգայի ավարտված մրցաշրջանում Սպերցյանը միջինը մեկ արդյունավետ գործողություն է գրանցել յուրաքանչյուր խաղում՝ 30 հանդիպումներում դառնալով 13 գոլի և 17 գոլային փոխանցման հեղինակ։
