Քոնոր Մակգրեգորը վերադառնում է օկտագոն․ հայտնի է հավանական մրցակցի անունը

UFC-ի կիսաթեթև և թեթև քաշային կարգերում նախկին չեմպիոն Քոնոր Մակգրեգորը պատրաստվում է վերադառնալ մեծ սպորտ։ Ակնկալվում է, որ իռլանդացի մարտիկն իր հաջորդ մենամարտը կանցկացնի UFC-ի մինչև 66 կգ քաշային կարգի նախկին տիտղոսակիր, ամերիկացի Մաքս Հոլոուեյի դեմ։

Ինչպես հայտնում է հեղինակավոր կանադացի մարզական լրագրող և ինսայդեր Արիել Հելվանին, Մաքս Հոլոուեյն ամենահավանական թեկնածուն է Մակգրեգորի հետ մենամարտելու համար։ Միևնույն ժամանակ, Խորխե Մասվիդալը չի դիտարկվում որպես պոտենցիալ մրցակից։ Սպասվում է, որ Մաքգրեգորի վերադարձը կկայանա հուլիսի 11-ին՝ Լաս Վեգասում անցկացվելիք UFC 330 մրցաշարի շրջանակներում։

Հիշեցնենք, որ մարտի 20-ին լրացել է Մակգրեգորի 18-ամսյա որակազրկման ժամկետը։ Այն սահմանվել էր Combat Sports Anti-Doping (CSAD) հակադոպինգային կոմիտեի կողմից 2025 թվականի հոկտեմբերին, քանի որ մարզիկը 2024 թվականին (հունիսի 13-ին, սեպտեմբերի 19-ին և 20-ին) երեք անգամ բաց էր թողել դոպինգ թեստավորումը։ Այդ բացթողումներից յուրաքանչյուրը որակվել էր որպես «գտնվելու վայրի մասին տեղեկատվության տրամադրման կանոնների խախտում»։

37-ամյա Մակգրեգորն օկտագոն դուրս չի եկել 2021 թվականի հուլիսից ի վեր, երբ UFC 264 մրցաշարի առաջին ռաունդում տեխնիկական նոկաուտով պարտվեց ամերիկացի Դասթին Պորյեին՝ ոտքի ծանր վնասվածքի պատճառով։ Ընդհանուր առմամբ, խառը մենամարտերում (MMA) իռլանդացու պրոֆեսիոնալ ակտիվում գրանցված է 22 հաղթանակ և 6 պարտություն։