Ինչպես արդեն ավելի վաղ հայտնել էինք, ԱՄՆ-ի Արիզոնա նահանգի Տեմպե քաղաքում անցկացված RAF 06 (Real American Wrestling) մրցաշարում Արման Ծառուկյանի և ամերիկացի բլոգեր, ըմբիշ Ջորջիո Պուլասի գոտեմարտը վերածվել է զանգվածային ծեծկռտուքի: Թեև UFC-ի թեթև քաշային կարգի դասակարգման երկրորդ համարը միջին քաշային կարգում (79 կգ) ընթացող ազատ ոճի ըմբշամարտի մենամարտում հաղթել է 5-3 հաշվով, սակայն իրական կրքերը բորբոքվել են մրցավարի եզրափակիչ ազդանշանից անմիջապես հետո:
Միջադեպի գլխավոր պատճառն ամերիկացի մարզիկի կողմից անընդմեջ հնչող ու գործադրվող սադրանքներն էին: Բազմաթիվ աղբյուրների համաձայն՝ Պուլասը գոտեմարտի հենց առաջին իսկ վայրկյաններից դիմել է հոգեբանական ճնշման և սադրիչ խոսակցությունների: Ավելին՝ նա մենամարտը սկսել է ապտակով, իսկ ընթացքում ևս մի քանի անգամ դիտավորյալ ձեռքի ափով հարվածել է Ծառուկյանի գլխին:
Նման պահվածքն, անշուշտ, անպատասխան չի մնացել: Գոտեմարտի ավարտին հայ մարտիկի նյարդերը տեղի են տվել: Եզրափակիչի սուլիչից անմիջապես հետո Ծառուկյանը հարձակվել է հատակին հայտնված մրցակցի վրա և սկսել ուժգին հարվածներ հասցնել նրան՝ ըստ շրջանառվող լուրերի վերջինիս բերելով անգիտակից վիճակի: Դրանից հետո մրցագորգի վրա անմիջապես սկսվել է զանգվածային բախում երկու մարզիկների թիմերի ներկայացուցիչների միջև:
Հիշեցնենք, որ 29-ամյա Ծառուկյանի համար սա երկրորդ ելույթն էր RAF լիգայում: Իր նորամուտը նա նշել էր հունվարի 10-ին՝ 10-0 հաշվով ժամկետից շուտ տպավորիչ հաղթանակ տանելով 38-ամյա ամերիկացի Լենս Պալմերի նկատմամբ: Խառը մենամարտերում (MMA) Հայաստանի ներկայացուցիչն ընդհանուր առմամբ անցկացրել է 26 հանդիպում՝ գրանցելով 23 հաղթանակ և ընդամենը 3 պարտություն:
Another angle of the brawl at RAF 06 shows Arman Tsarukyan landing a clean shot on Georgio Poullas 😬
(via @_wrestlersgrind) https://t.co/e9WYcqduSq pic.twitter.com/Q6fMcpNHiS
— Championship Rounds (@ChampRDS) March 1, 2026
