Բրիտանացի մարտիկ Փեդի Փիմբլեթը կոշտ արտահայտություններ է արել թեթև քաշային կարգի (մինչև 70 կգ) վարկանիշային աղյուսակի առաջատար Արման Ծառուկյանի հասցեին։ Փիմբլեթն UFC-ի վարկանիշում զբաղեցնում է հինգերորդ տեղը։
«Կշռման արարողության ժամանակ նա գլխով հարվածեց Հուկերին և քիչ էր մնում տապալեր ևս մեկ գլխավոր մենամարտ: Նրան ամբողջ կյանքում հովանավորել են և ամեն ինչ մատուցել արծաթե սկուտեղի վրա: Նա չի կարողանում իրեն տիրապետել: Ինչո՞ւ ընդհանրապես պետք է կշռման արարողության ժամանակ հարվածել մարդուն: Դա անմիջապես ցույց է տալիս, թե ինչպիսի հիմար է նա: Նա քիչ էր մնում մրցաշարը թողներ առանց գլխավոր մարտի. եթե Դեն Հուկերը գիտակցությունը կորցներ, մենամարտը կչեղարկվեր:
Իսկ հիմա նա նվնվում է, թե ինչու իրեն տիտղոսային մենամարտի հնարավորություն չեն տալիս: Պատճառն այն է, որ նրան անհնար է վստահել: Նա ինքն է ստեղծում խնդիրները: Կարծում է, թե քանի որ ընտանիքը փող ունի, իրեն ամեն ինչ կարելի է: Ո՛չ, դա այդպես չի աշխատում: Նա պետք է ձայնը կտրի և զբաղեցնի իր տեղը: Ոչ ոք չի ցանկանում դիտել նրա ելույթները. նա ձանձրալի է, իսկ նրա մարտերը՝ սարսափելի տաղտկալի: Չարլզ Օլիվեյրան երբեք անհետաքրքիր չի լինում, բայց Ծառուկյանը նույնիսկ նրա դեմ մենամարտը կարողացավ ձանձրալի դարձնել»,- Փիմբլեթի խոսքերն է մեջբերում BJ Penn-ը։
Հիշեցնենք, որ Փիմբլեթն օկտագոն դուրս կգա ժամանակավոր գոտու համար պայքարում հունվարի 25-ին՝ Լաս Վեգասում կայանալիք UFC 324 մրցաշարում, որտեղ նրա մրցակիցը կլինի ամերիկացի Ջասթին Գեյջին:
