«Կրասնոդարի» գլխավոր մարզիչ Մուրադ Մուսաևը մեկնաբանել է թիմի ավագ Էդուարդ Սպերցյանի՝ եվրոպական ակումբ տեղափոխվելու հնարավորության մասին լուրերը։ Ավելի վաղ հաղորդվում էր, որ հայ կիսապաշտպանի ծառայություններով հետաքրքրված են ՊՍԺ-ն և «Ժիրոնան»։
«Լուրեր շատ կան, և ես չեմ կարող դրանք մեկնաբանել։ Երեկ խոսվում էր ՊՍԺ-ի մասին, այսօր՝ «Ժիրոնայի», վաղը երևի մեկ ուրիշ ակումբ կհայտնվի։ Իրականում դրանք ընդամենը խոսակցություններ են։ Էդիկը «Կրասնոդարի» խաղացողն է, թիմի ավագը։ Եթե ակումբում ինչ-որ բան տեղի ունենա, կքննարկենք, կխոսենք։ Մինչ այժմ ոչինչ չի փոխվել, և նա հանգիստ շարունակում է խաղալ։
Մենք տեսանք՝ այսօր նա գոլային փոխանցում կատարեց, նաև դարձավ գոլի հեղինակ։ Կարևորն այն է, որ նա հանգիստ է։ Մեկ տարի առաջ այդպես չէր։ Երբ տրանսֆերային պատուհանը փակվեց, որոշ ժամանակ պահանջվեց, որպեսզի վերադառնա իր խաղին, հետո կրկին արդյունավետ սկսեց հանդես գալ։ Այդ առումով նման խոսակցությունները սովորական են՝ երբ լավ խաղացողների անունները տարբեր ակումբների են կապում։ Բայց այս պահին ես ոչ մի տեղեկություն չունեմ նրա հեռանալու վերաբերյալ»,– ասել է Մուսաևը խաղից հետո կայացած մամուլի ասուլիսում։
Հիշեցնենք, որ այսօր՝ հուլիսի 20-ին կայացած ՌՊԼ-ի առաջին տուրի խաղում «Կրասնոդարը» 3:0 հաշվով հաղթեց «Պարի Նիժնի Նովգորոդին», իսկ Սպերցյանը դարձավ գոլի և գոլային փոխանցման հեղինակ։
