Մեկ տարի առաջ այս օրը՝ 2024 թվականի ապրիլի 29-ին, հայկական ֆուտբոլը կորցրեց իր նվիրյալներից մեկին՝ մարզական լրագրող, Փյունիկ» ֆուտբոլային ակումբի գլխավոր քարտուղար Դավիթ Մարտիրոսյանին:
Հայկական ակումբներն այսօր հարգանքի տուրք են մատուցել Մարտիրոսյանի հիշատակին՝ սոցիալական ցանցի էջերում գրառումներ կատարել:
«Արդեն մեկ տարի առանց մեր սիրելի Դավիթի…
Դավիթը, մեզ հետ է իր կատարած գործով, իր բարի խոսքով ու իր օրինակով։ Նա մեր ֆուտբոլային ընտանիքում թողեց իր հետքը, որը ժամանակը ջնջել չի կարող։
«Փյունիկ» ՖԱ-ի սիրելի Դավի՛թ, մեր հիշողություններում ու սրտերում կլինես միշտ»,- ասվում է «Փյունիկի» տարածած հաղորդագրության մեջ:
«Մեկ տարի առաջ մենք կորցրեցինք մեր ընկերոջը, գործընկերոջը և մեր ակումբի երկարամյա աշխատակցին՝ Դավիթ Մարտիրոսյանին։
Դժվար է բառերով փոխանցել, թե որքան նկատելի է նրա տեղը հայկական ֆուտբոլում։
Մենք վստահ ենք, որ նրա հետ ոչ միայն հայկական ֆուտբոլը կլիներ ավելի լավը, այլև բոլոր նրանց կյանքը, ովքեր ճանաչում էին Դավիթին։
Աստված հոգիդ լույսերի մեջ պահի, Դավիթ ջան»,- ասվում է «Ուրարտուի» տարածած հաղորդագրության մեջ:
«Հայկական ֆուտբոլի իրական նվիրյալ ասելիս` բոլորս, անմիջապես ու առաջինը, մտաբերում ենք Դավիթ Մարտիրոսյանին։
Մեր Դավիթը! Հպարտությամբ պետք է ասենք, որ անսպառ էներգիայով լեցուն, խելացի, կրեատիվ մտքով եւ անընդհատ զարգացող երիտասարդը հասցրել է մասը կազմել նաեւ մեր ակումբի։
Ուղիղ մեկ տարի է` Դավիթը ֆիզիկապես մեզ հետ չէ։ Սակայն, քանի դեռ կա ֆուտբոլային հանրությունը, համոզված ենք, որ Դավիթի հիշատակը միշտ վառ է հայկական ֆուտբոլային աշխարհում։
Լույսերի մեջ մնաս, Դավիթ ջան…»,- ասվում է «Գանձասարի» տարածած հաղորդագրության մեջ:
«Մարզիչ՝ Դավիթ Մարտիրոսյան,
Մեկ տարի առանց քեզ …»,- գրել է ֆուտբոլի Հայաստանի ազգային հավաքականի նախկին կիսապաշտպան, Հայաստանի մինչեւ 17, 18, 19, 21 տարեկանների հավաքականների նախկին գլխավոր մարզիչ Արթուր Ոսկանյանը՝ հրապարակելով «Ուրարտուի» վետերանների մասնակցությամբ ֆուտբոլային խաղից լուսանկար:
Դավիթ Մարտիրոսյանը երկար տարիներ գործունեություն է ծավալել հայկական ֆուտբոլում, ավարտել է Երևանի Պետական Համալսարանի Լրագրության ֆակուլտետը: 2012 թվականից մինչև 2020-ը թղթակցել է «Ֆուտբոլ Պլյուս» շաբաթաթերթին: Դավիթը աշխատել է «Միկա» ու «Գանձասար-Կապան» ֆուտբոլային ակումբների մամուլի բաժնում:
2019-ից Մարտիրոսյանը համալրել է «Ուրարտու» ֆուտբոլային ակումբը` որպես հանրային կապերի և մամուլի բաժնի ղեկավար, այնուհետև դարձել գործադիր տնօրեն և կոմերցիոն հարցերով փոխտնօրեն։
Մարտիրոսյանը նաև հանդիսանում էր Newmag հրատարակչատան սպորտային մատենաշարի ղեկավարը:
