Մադրիդի «Ռեալի» վինգեր Ռոդրիգո Գոեսի հայրը հանդիպել է «Մանչեսթեր Սիթիի» ներկայացուցիչների հետ, որի ընթացքում նրանք փորձել են համոզել բրազիլացի ֆուտբոլիստին տեղափոխվել անգլիական թիմ։ Այս մասին El Chiringuito-ի համար հայտնել է լրագրող Էդուարդո Ինդան։
Ըստ աղբյուրի՝ հիշյալ հանդիպումը տեղի է ունեցել մի քանի շաբաթ առաջ։ «Մանչեսթեր Սիթիի» ներկայացուցիչները Ռոդրիգոյին առաջարկել են ավելի բարձր աշխատավարձ, քան նա ստանում է իսպանական գրանդում, ինչպես նաև երաշխիք են տվել, որ նա կխաղա իր նախընտրած հարձակողական դիրքում։
Այս մրցաշրջանում բրազիլացի հարձակվողը բոլոր մրցաշարերում մասնակցել է 41 հանդիպման՝ դառնալով 13 գոլի և 8 գոլային փոխանցման հեղինակ։ Ֆուտբոլիստի ներկայիս աշխատանքային պայմանագիրն ակումբի հետ ուժի մեջ է մինչև 2028 թվականի ամառը: Transfermarkt պորտալում ներկայացված տեղեկատվության համաձայն՝ ֆուտբոլիստի շուկայական արժեքը կազմում է 100 միլիոն եվրո:
