Սլովակիայի 7-ակի չեմպիոն «Ժիլինան», ինչպես ավելի վաղ հայտնել էինք, կորոնավիրուսի պատճառով առաջացած ֆինանսական խնդիրները չհաղթահարելով, մոտ ժամանակներս կարող է լուծարվել։
Հայաստանի երիտասարդական հավաքականի ֆուտբոլիստ Վահան Բիչախչյանն ArmSport-ի հետ զրույցում հայտնել է, որ իր համար ևս անակնկալ էր այս նորությունը:
20-ամյա ֆուտբոլիստը, որը 2017 թվականից է հանդես գալիս Սլովակիայի ամենահեղինակավոր ակումբներից մեկում, մարտի կեսերին վերադարձել է Գյումրի, քանի որ կարանտինայում շրջանում ակումբը որոշել էր լեգիոներ ֆուտբոլիստներին իրենց ընտանիքների հետ լինելու հնարավորություն տալ, բայց լուծարման վերաբերյալ որևէ խոսակցություն երբևէ չի եղել.
«Ինձ համար էլ էր անակնկալ նման նորությունը: Հիմա սպասողական վիճակ է: Ինքս ինֆորմացիայի չեմ տիրապետում, բայց շարունակում ենք մեր մարզումները, որոնք մարզիչներն օնլայն են ուղարկում: Հիմա պետք է սպասենք, տեսնենք՝ հետագան ինչպես կզարգանա: Անսպասելի եմ իմացել այդ մասին ու զարմացած եմ: Տեսնենք՝ ինչ կլինի»,- ArmSport-ի հետ զրույցում ասել է Վահան Բիչախչյանը:
Ավելի վաղ հաղորդվում էր՝ ակումբն արդեն հայտնել է թիմի ֆուտբոլիստներին և աշխատակիցներին, որ ապրիլի 30-ից հետո նոր ակումբ գտնեն իրենց համար:
Վահանի խոսքով, իրեն այդպիսի զգուշացում չի արվել: Ֆուտբոլիստը վստահ է՝ լուծարում որպես այդպիսին չի լինի.
«Ես «Ժիլինայի» ֆուտբոլիստ եմ, ու կարծում եմ՝ ակումբը կշարունակի իր գործունեությունը: Սպասում եմ՝ վիրուսի հետ կապված այս արտակարգ դրությունն ավարտվի, որպեսզի նորից միանամ իմ թիմին»:
Սլովակիայի ընթացիկ առաջնությունում Վահան Բիչախչյանը «Ժիլինայի» գլխավոր թիմի կազմում 4 հանդիպման է մասնակցել:
Նարե Հովհաննիսյան
