Macron-ն ու Հայաստանի ֆուտբոլի ֆեդերացիան ՈւԵՖԱ-ի Ազգերի լիգայի խաղարկությունից առաջ ներկայացրել էին մեր ընտրանու նոր խաղաշապիկները։
Կարելի է ասել, որ նոր խաղաշապիկները հաջողություն բերող էին․ մեր հավաքականը երեկ՝ սեպտեմբերի 7-ին, 4։1 հաշվով հաղթեց Լատվիայի ընտրանուն:
«Նոր հավաքածուն բնութագրվում է հայ ազգի գույներով և խորհրդանիշներով: Ինչպես Macron-ի կողմից գործընկեր ֆեդերացիաների համար արտադրվող բոլոր մարզաշապիկները, այնպես էլ Հայաստանի նոր խաղային հավաքածուն էլ պատրաստված է Eco Fabric-ից (պոլիեսթեր նյութ), որն ամբողջությամբ ստացվում է վերամշակված պլաստիկից։
Նոր տնային խաղաշապիկը ունի մուգ կարմիր գույն՝ թևերի եզրերին կարմիր, կապույտ և նարնջագույն դետալներով։ Շապիկի առջևի մասում՝ ներքևում, մի փոքր մուգ կարմիրով պատկերված է Արարատ լեռան ուրվագիծը, Macron Hero-ն և Հայաստանի ֆուտբոլի ֆեդերացիայի տարբերանշանը տպված են կրծքամասում։
Պիտակը զարդարված է ՀՖՖ-ի, Macron-ի տարբերանշաններով և «Designed in Bologna» գրությամբ, որն հավաստում է, որ հագուստը նախագծված և մշակված է Macron Campus-ում։ Հայաստանի դրոշը տպված է նաև պարանոցի հետևում։ Շորտերն ու գուլպաներն էլ են մուգ կարմիր, բայց գուլպաների մեջտեղում երեք շերտով կարմիր, կապույտ և նարնջագույն գծեր են։
Արտագնա խաղերի համար նախատեսված խաղաշապիկն ամբողջությամբ սպիտակ է, կողքերին՝ Հայաստանի ազգային դրոշի ավանդական կարմիր, կապույտ և նարնջագույն գույները՝ թավշյա էֆեկտով։ Շապիկն ունի հյուսված կլոր օձիք և թևեր՝ զարդարված հայկական մշակույթին բնորոշ զարդանախշերով։
Պարանոցի հետևում մուգ կարմիրով ասեղնագործված է «ՀԱՅԱՍՏԱՆ» բառը։ Շորտերն ու գուլպաներն էլ սպիտակ են, սակայն գուլպաների մեջտեղում կա երեք գիծ՝ կարմիր, կապույտ և նարնջագույն գույներով։ Հայաստանի ընտրանու նոր խաղաշապիկների բոլոր տարբերակները Slim Fit ձևով են»,- գրված է Macron-ի պաշտոնական կայքում։
ԵՎ ՎԵՐՋՈւՄ․․․ 😊
Հատկանշական է, որ տարիներ առաջ, երբ ՀՖՖ-ն և Macron-ը պայմանագիր կնքեցին, Armsport-ը ներկայացրեց մեր ընտրանու խաղաշապիկի իր կոնցեպտային դիզայնը, որտեղ ևս նմանատիպ կերպով ուրվագծվում էր Արարատ լեռը։
