«Չելսին» ամենաակտիվներից մեկն է այս ամառային տրանսֆերային պատուհանի ժամանակ։ Ակումբը հայտարարել է «Բազելի» 20-ամյա կիսապաշտպան Ռենատու Վեյգայի տրանսֆերի մասին։
Կողմերը կնքել են 7 տարվա պայմանագիր, որը ներառում է պայմանագիրը ևս մեկ մրցաշրջանով երկարաձգելու տարբերակ։ Տրանսֆերի գումարը կազմել է 14 մլն եվրո։ Նախորդ մրցաշրջանում Վեյգան մասնակցել է 27 հանդիպման՝ դառնալով 2 գոլի և 1 գոլային փոխանցման հեղինակ։ Իր կարիերայի սկզբում Վեյգան հանդես է եկել «Սպորտինգում» և «Աուգսբուրգում»:
Ավելի վաղ «Չելսին» ձևակերպել էր «Աստոն Վիլայի» ֆուտբոլիստ Օմարի Կելիմանի տրանսֆերը, հայտնում է ակումբի մամուլի ծառայությունը։ Լոնդոնյան ակումբը կիսապաշտպանի տրանսֆերի դիմաց վճարել է 22,5 մլն եվրո (ըստ՝ Transfermarkt-ի)։ 18-ամյա Կելիմանը Անգլիայի Մ19 հավաքականի ֆուտբոլիստ է։ Նա «Աստոն Վիլայի» ակադեմայի սան է։ Նախորդ մրցաշրջանում նա երկու հանդիպում է անցկացրել ԱՊԼ-ում։
«Բարսելոնայի» հարձակվող Մարկ Գիուն ևս դարձել է «Չելսիի» ֆուտբոլիստ, հայտնում է լոնդոնցիների պաշտոնական կայքը։ 18-ամյա իսպանացին 5 տարվա պայմանագիր է կնքել «Չելսիի» հետ՝ ևս մեկ մրցաշրջանով երկարաձգելու հնարավորությամբ։ Գիյուն Բարսելոնայի ակադեմիայի սան է։ Նա 7 հանդիպում է անցկացրել կատալոնական թիմի հիմնական կազմում՝ դառնալով երկու գոլի հեղինակ։
Այս ամառ լոնդոնյան թիմի կազմը համալրել է նաև «Լեսթերի» կիսապաշտպան Կիրնան Դյուբերի-Հոլը։ 25-ամյա անգլիացու հետ պայմանագիրը նախատեսված է մինչև 2030 թվականը։ Transfermarkt-ը ֆուտբոլիստի տրանսֆերային արժեքը գնահատում է 30 միլիոն եվրո: Անցած մրցաշրջանում Դյուբերի-Հոլը անցկացրել է 49 հանդիպում՝ դառնալով 12 գոլի և 15 գոլային փոխանցման հեղինակ։
Դեռ հունիսին «Չելսին» իր պաշտոնական կայքում հայտարարել էր բրազիլական «Պալմեյրասից» 17-ամյա վինգեր Էստևան Վիլիանի տեղափոխության մասին։ Ֆուտբոլիստը անգլիացիներին կմիանա 2025 թվականի ամռանը։ Ավելի վաղ լրագրող Ֆաբրիցիո Ռոմանոն հայտնել էր, որ ակումբները համաձայնության են եկել տրանսֆերային պայմանների շուրջ, որոնք ներառում են տրանսֆերի համար 40 միլիոն եվրո գումար և հավելյալ 25 միլիոն եվրո բոնուսներ: Հիշեցնենք, որ 17-ամյա Էստևան Վիլիանը բրազիլական «Կրուզեյրոյի» սան է, որտեղից 2021 թվականին տեղափոխվել է «Պալմեյրաս»։
Իսկ ահա «Ֆուլհեմի» պաշտպան Տոսին Ադարաբիոյոն ազատ գործակալի կարգավիճակով է պայմանագիր է կնքել «Չելսիի» հետ։ 26-ամյա անգլիացու հետ պայմանագիրը նախատեսված է մինչև 2028 թվականը։ 2023/24 մրցաշրջանում պաշտպանն անցկացրել է 25 հանդիպում և դարձել երկու գոլի հեղինակ։
Վար Բաբայան
