ԲԿՄԱ-ի գլխավոր մարզիչ, անվանի մասնագետ Ռաֆայել Նազարյանն այլևս չի հանդիսանում Հայաստանի Մ19 տարեկանների հավաքականի գլխավոր մարզիչը:
Այս մասին ArmSport-ին հայտնել է անձամբ Ռաֆայել Նազարյանը.
«Մեզնից սպասելիքները շատ մեծ էր, բայց չարդարացրինք: Հստակ ասեմ: Եթե չենք արդարացրել, ուրեմն ես այլևս Մ19-երի հավաքականի գլխավոր մարզիչը չեմ: Կարծում եմ` հաճախակի պետք է մարզիչների փոփոխություն տեղի ունենա: Վերելակ չէ, որ նստես ու անընդհատ բարձրանաս-իջնես հավաքականներով: Ամեն դեպքում, անձամբ իմ սպասելիքները ևս մեծ էին, որ չարդարացան»,- մեզ հետ զրույցում ասել է Ռաֆայել Նազարյանն ու խոսել Եվրոպայի մինչև 19 տարեկանների 2020 թ. առաջնության որակավորման խմբային փուլում անհաջողության պատճառների մասին.
«Մեր ֆուտբոլիստներն ուժային առումով զիջում էին: Գուցե` մտքով, տակտիկապես, տեխնիկապես շատ ավելի լավն էին, բայց մենք չհասցրինք լրացնել այդ բացը:
Իհարկե, Բուլղարիայի հետ երկրորդ խաղի առաջին կեսում 70 տոկոս տիրել ենք գնդակին, բայց դա ոչինչ չի տալիս: Ես կողմնակից չեմ գնդակին շատ տիրելուն, ես կողմնակից եմ ուղղահայաց խաղին: Թուրքիայի հավաքականն, իհարկե, մրցակցությունից դուրս էր, բայց երրորդ խաղը` Մոնտենեգրոյի հետ, շատ լավ խաղացինք:
Շատ-շատ լավ խաղացինք, հատկապես երկրորդ կեսում: Տատանումներ կային, կայունություն չկար, հատկապես` պաշտպանությունում: Այստեղ ես միայն պաշտպաններին նկատի չունեմ, այլ` կենտրոնական հարձակվողներին ևս: Ամբողջ թիմով պետք է ճիշտ պաշտպանություն կազմակերպվի, համբերատար լինեն, անհրաժեշտության դեպքում ագրեսիվ լինեն, կամ գնան կոնտակտի, խլման, կամ անհրաժեշտության դեպքում սպասեն, ժամանակ խլեն … մի խոսքով, պաշտպանական շատ գործողություններ կաղում էին: Ես անձամբ որպես մարզիչ չէի հասցրել լրացնել այդ բացը»,- խոստովանում է Ռաֆայել Նազարյանը:
Հիշեցնենք` մինչև 19 տարեկանների Եվրոպայի 2020 թվականի առաջնությունում Հայասանի ընտրանին ելույթներն ավարտեց մրցաշարային աղյուսակի վերջին տեղում: Առաջին խաղում մեր ընտրանին 1:4 հաշվով պարտվեց Թուրքիայի իր հասակակիցներին, այնուհետև 0:3 հաշվով զիջեց Բուլղարիայի ընտրանուն, իսկ խմբային փուլն ավարտեց Մոնտենեգրոյի Մ19 հավաքականի հետ ոչ-ոքիով (3:3):
Ռաֆայել Նազարյանը, որը 2019 թվականի օգոստոսին էր գլխավորել Հայաստանի Մ19 հավաքականը, ԵԱ-ի որակավորման փուլից հետո է ցանկություն հայտնել այլևս չաշխատելու 19-երի հավաքականի հետ.
«Հայաստանի Մ19 հավաքականի առանձնահատկությունն այն է, որ ամեն տարի նոր տարիք է խաղում, իսկ դա իր բարդություններն ունի: Իսկ ԲԿՄԱ-ն ապագա Մ21 տարեկանների հավաքականն է: Չգիտեմ` ով կլինի Մ19-երի ապագա մարզիչը, բայց հուսով եմ`ավելի խաղակցված ու ամուր թիմ կունենա»,- նշում է Ռաֆայել Նազարյանը:
Հիշեցնենք` Հայաստանի Մ19 տարեկանների հավաքականը 2020 թվականի սեպտեմբերի 2-ից 8-ը կմասնակցի Ազգերի լիգայի մրցաշարին: Մերոնք ընդգրկվել են C լիգայի առաջին խմբում, որտեղ կմրցեն Կոսովոյի, Լյուքսեմբուրգի և Էստոնիայի հավաքականների հետ։
Իսկ Եվրոպայի Մ19 առաջնության որակավորման փուլում մեր ընտրանին ընդգրկվել է 11-րդ խմբում, որտեղ կմրցի Նիդերլանդների, Սերբիայի և Սան Մարինոյի հավաքականների հետ։ Հանդիպումները կանցկացվեն հոկտեմբերի 7-ից 13-ը՝ Նիդերլանդներում։
Ռաֆայել Նազարյանի հետ ArmSport-ի հարցազրույցն ամբողջությամբ` շուտով:
