Ադրբեջանցիները տեսանյութ են տարածել, որում երևում է՝ ինչպես են կանգնեցնում երեխաներ տեղափոխող ավտոբուսը, դանակով քերելով մաքրում ավտոբուսի վրա փակցված Արցախի Հանրապետության դրոշի պատկերն ու բացելով մեքենայի դուռը՝ երեխաներին ասում. «Լեռնային Ղարաբաղն Ադրբեջան է»:
Այդ երեխաները «Լեռնային Արցախ» ակումբի մինչև 17 տարեկանների թիմի ֆուտբոլիստներն են, ովքեր վերադառնալիս են եղել մանկապատանեկան առաջնության խաղից: Այս մասին ArmSport-ը տեղեկացավ «Լեռնային Արցախ» ակումբից:
Մեզ հետ զրույցում ակումբից նշեցին, որ երեխաների հետ ամեն ինչ կարգին է, նրանք չեն վախեցել: Նշեցին նաև, որ մոտ օրերս միջադեպի վերաբերյալ հանդես կգան պաշտոնական հայտարարությամբ:
Ֆեյսբուքյան օգտատեր Արմինե Հայրապետյանն էլ ավելի վաղ գրել էր, որ տեսանյութում երևացող տղաներից մեկը Արթուր Ասկարյանն է՝ 44-օրյա պատերազմում հերոսաբար զոհված Գենադի Ասկարյանի որդին:
«Այսօր այս պատանիներին տեղափոխող ակումբի ավտոբուսը հոգեբանական գրոհի է ենթարկվել մի խումբ ստահակների կողմից։ Տեսանյութում առաջին նստած տղան, ով մի նյարդային շարժում անգամ չի անում դիմակավոր ադրբեջանցու վայրահաչոցի ժամանակ, այս թիմի ավագն է՝ Արթուր Ասկարյանը, 44-օրյա պատերազմում հերոսաբար զոհված Գենադի Ասկարյանի որդին… ինչ է զգացել Արթուրն այդ պահին՝ դժվար է պատկերացնել, բայց ասում է, որ դա հաստատ վախ չի եղել»,- ֆեյսբուքյան իր էջում գրել է Արմինե Հայրապետյանը:
