Երեկ հայկական ֆուտբոլում իրադարձություններով հարուստ օր էր։ Ճիշտ է, պատճառը ոչ թե որևէ մրցաշարի եզրափակիչն էր, կամ էլ կարևորագույն խաղն ու ինչ-որ ռեկորդ, այլ ակումբներից մեկի՝ առաջնությունից դուրս գալու որոշումը։ Վանաձորի «Լոռիի» ու Հայաստանի ֆուտբոլի ֆեդերացիայի միջև տարաձայնությունները եկան մի կետի, որից հետո «կանաչները» որոշեցին հեռանալ առաջնությունից։ Փորձենք հասկանալ՝ ինչ եղավ ու ինչպես է ազդելու «Լոռիի» հեռանալը առաջնության ընթացքի վրա։
Մրցավարի սխալը՝ գլխավոր պատճառ
7-րդ տուրից հետաձգված «Լոռի» — «Ալաշկերտ» խաղի պատմությունը բոլորին է հայտնի։ «Ալաշկերտը» 5 փոփոխություն է կատարել 4 դադարի ընթացքում, մինչդեռ ՖԻՖԱ-ի կանոններով՝ թույլատրվում է այդ փոփոխությունները կատարել երեք դադարով։ «Լոռին» դիմել էր ՀՖՖ-ին՝ պահանջելով տեխնիկական պարտություն գրանցել «Ալաշկերտին»։ Այս պատմության գլխավոր մեղավորը թերևս մրցավարն էր, որը դադարի ընթացքում չսպասեց երկրորդ փոխարինմանն ու սուլեց՝ թույլ տալով շարունակել խաղը։ «Ալաշկերտը» փոփոխությունը կատարեց հաջորդ դադարին։
Պատճառներից մեկն էլ դեռևս կորոնավիրուսի համավարակի սկզբում գրանցված տեխնիկական պարտությունն էր։ Վանաձորյան թիմը չէր ներկայացել խաղերից մեկին, քանի որ թիմում Covid-19-ի մի քանի դեպքեր կային։ «Լոռիին» տրվել էր տեխնիկական պարտություն, մինչդեռ ակումբը ՀՖՖ-ին դիմել էր, որպեսզի նրանք ընդառաջեն ակումբում տիրող համաճարակային իրավիճակին ու թույլ տան, որպեսզի խաղը վերախաղարկվի։
«Լոռիի» ու ՀՖՖ-ի միջև տարաձայնությունների պատմությունը
Ոչ մեկի համար գաղտնիք չէ, որ «Լոռիի» հիմնադիր նախագահ Թովմաս Գրիգորյանի ու ֆուտբոլի ֆեդերացիայի նախագահ Արմեն Մելիքբեկյանի հարաբերությունները մեղմ ասած ջերմ չեն։ Հենց նրանք էին պայքարում ֆեդերացիայի նախագահի պաշտոնում ընտրվելու համար ու այնպիսի տպավորություն է, որ այդ պայքարը դեռ չի ավարտվել։ Այս ընթացքում ակումբի ու ֆեդերացիայի միջև բազմաթիվ տարաձայնություններ են եղել։ ՖԻՖԱ-ի որոշումը ՀՖՖ-ի կողմից սխալ մեկնաբանելուց մինչև խաղացանկ, ու այս ամենն արվել է բացահայտ կերպով։ Մեղադրանքները հիմնականում «Լոռիի» կողմից են, վերջինն էլ, իհարկե, Թովմաս Գրիգորյանի գրառումն էր, որտեղ վանաձորյան թիմի նախագահը մեղադրեց ֆուտբոլի ֆեդերացիային ակումբների շրջանում յուրայիններ ու օտարներ ունենալու մեջ։
Մեծ հարված հայկական ֆուտբոլին
Անկախ մրցավարի սուլիչից, որը գլխիվայր շրջեց ամեն բան, անկախ ակումբի ու ֆեդերացիայի տարաձայնություններից, այս ամենում հերթական անգամ տուժում է հայկական ֆուտբոլը։ «Լոռին» վերջին տարիներին հայկական ֆուտբոլի ամենալուսավոր կետերից էր ու առաջին հերթին դա մարզային ֆուտբոլի վերականգմանն ուղղված քայլերի և երկրպագուների հիասքանչ աջակցության շնորհիվ էր։ Այսպիսի թիմի հեռանալը առաջնությունից հարված է հայկական ֆուտբոլին, առանց այն էլ, որ «Լոռին» շարունակում էր պայքարը եվրագավաթային տեղերում հայտնվելու համար։
Պատճա՞ռ, թե՞ առիթ
Յուրաքանչյուր իրադարձություն ունենում է իր պատճառն ու առիթը։ Արդյո՞ք «Լոռիի» հեռանալու պատճառը «Ալաշկերտի» դեմ խաղում տեղի ունեցածն էր ու բողոքարկման կոմիտեի չհրապարակված որոշումները, թե՞ սա պարզապես առիթն էր առաջնությունից հեռանալու։ Սրանք հարցեր են, որոնք բաց են մնում։ Այս առումով քննարկումները հիմա շատ են, սակայն թե ո՞րն էր իրական պատճառը, ցույց կտա ժամանակը։ Ամեն դեպքում, եթե սա էր պատճառը առաջնությունից հեռանալու, գուցե քայլն առավել քան ծայրահեղ էր։ Պետք էր մնալ, աշխատել, փորձել ապացուցել, որ թիմը կարող է արդյունքներ գրանցել նաև այսպիսի «ճնշումների» ներքո։ «Լոռիի» գլխավոր մարզիչը օրեր առաջ հիշեց եվրոպական ֆուտբոլի թոփ մասնագետներին ու թերևս կարելի է նրանցից օրինակ վերցնել, թե ինչպես նրանք չեն քննարկում օրացույց կազմողներին, մրցավարներին ու շարունակում են նայել միայն իրենց թիմին ու շարժվել առաջ։
Իսկ եթե տեղի ունեցածն ընդամենը առիթ էր առաջնությունից դուրս գալու, ապա պետք է հասկանալ իրական պատճառները։ Ի՞նչն է մարզային թիմին ստիպել այսպիսի որոշում կայացնել։ Ի վերջո այս պահին մշուշոտ է թվում նաև «Լոռիի» ապագան, քանի որ փակուղի տանող այս որոշումը միայն ու միայն վնասում է հենց վանաձորյան թիմին ու նաև հայկական ֆուտբոլին ու չի զտում իրավիճակը, որի մեջ հայտնվել են կողմերը։
Իհարկե, ցավալի է նաև այն փաստը, որ «Լոռին» թիմ է, որը մրցաշարային աղյուսակի երրորդ տեղում էր, ու պայքարում էր եվրագավաթային տեղերի համար։ Այսպիսի թիմի հեռանալը առաջնությունից մեծ հարված է նաև առաջնությանը։
ՀՖՖ նախագահի արձագանքը
Ցավալի լուր, անհեռանկար ու սխալ քայլ։ Ահա այսպես է վանաձորյան ակումբի ղեկավարության որոշումը բնութագրում Հայաստանի ֆուտբոլի ֆեդերացիայի նախագահ Արմեն Մելիքբեկյանը։ Նա կարծում է, որ հավաքականի խաղերին ընդառաջ այս քայլը լարվածության ու սկանդալի իմիտացիա ստեղծելու նպատակ ունի։ Ինչևէ, Արմեն Մելիքբեկյանը այլ մեկնաբանություն չի անի, մինչև հավաքականի խաղերի ավարտը։
Ինչ հետևանքներ կարող է ունենալ «Լոռիի» հեռանալը
Այդքան էլ բարդ չէ հասկանալը, թե ինչ է սպասվում «Լոռիին» մրցաշարային տեսանկյունից։ Մենք ունենք «Գանձասար-Կապանի» օրինակը։ Նախ «Արարատի» դեմ խաղում վանաձորյան թիմին կտրվի տեխնիկական պարտություն։ Նույնն է սպասվում նաև նախատեսված խաղերում։ Այսպիսով, «Լոռիի» մրցակիցները կունենան «նվեր» 3 միավորի տեսքով, ինչը, իհարկե, լավագույն բանը չէ, որ կարելի է հանդիպել ֆուտբոլում։
Եթե ՀՖՖ-ն հաստատի «Լոռիի» հեռանալու որոշումը, վանաձորյան թիմը հաջորդ մրցաշրջանում չի կարողանա մաս կազմել Բարձրագույն խմբին։ «Լոռին» պետք է ամեն ինչ սկսի նորից՝ առաջին լիգայից։ Ինչևէ, իրավիճակը բավականին բարդ է։ Սպասենք առաջիկա զարգացումներին։
Արամ Սահակյան
