«Նոան» առաջնության այս հատվածում կփորձի առավելագույնը քաղել: Այս մասին ArmSport-ի հետ զրույցում ասաց «Նոայի» գործադիր տնօրեն Արթուր Սահակյանը, որի հետ խոսել ենք հոլդինգի ամբիցիաների, ծրագրերի և այլ հարցերի մասին:
-Ի՞նչ նպատակ է հետապնդում «Նոա» հոլդինգը՝ տարբեր երկրներում ակումբներ ձեռք բերելով:
-Նախևառաջ, «Նոա» հոլդինգը բիզնես-կազմակերպություն է, որը բիզնես հեռանկարներ է հետապնդում: Ցանկացած հնարավորության դեպքում կփորձենք Եվրոպայում ևս ամրապնդվել, կոնկրետ այս պահին երկու երկրի մասին է խոսքը, իսկ հնարավորության դեպքում, կավելացնենք:
-Այս պահին աշխատանքներ տարվո՞ւմ են այլ երկրներում ակումբներ ձեռք բերելու հետ կապված:
-Դեռևս երկու ակումբներում պիտի ավելի բուռն գործունեություն ծավալենք, հետո նոր հնարավոր կլինի մտածել այլ երկրների մասին:
-Հիմա «Սիենայի» հետ կապված ի՞նչ պլաններ կան:
-Ակումբը D դիվիզիոնում է հանդես գալիս և մեկ դիվիզիոն բարձրանալու առաջադրանք է դրված:
-Ավելի վաղ նշվում էր, որ «Սիենայի» նախագծում ներգրավված կլինեն մարդիկ, ովքեր ակտիվորեն աշխատում են նաև «Նոայի» հետ…
-Ակումբները պատկանում են նույն հոլդինգին և շատ հնարավոր է, որ աշխատակիցները երկու ակումբներում իրենց գործերը համատեղեն: Երեք ակումբներում: Լինեն փորձի փոխանակումներ, աշխատանքային այցեր Հայաստանից Իտալիա, Իտալիայից Հայաստան:
-Ֆուտբոլիստների փոխանակումներ կլինե՞ն:
-Հնարավոր է: Ներկայումս չկա, բայց մոտ ապագայում կլինեն նման բաներ:
-Լատվիական ակումբի հետ ի՞նչ պլաններ կան:
-Ակումբը դեռևս նոր ենք ձեռք բերել, բայց լուրջ հեռանկարային թիմ ստեղծելու առաջադրանք է դրված: Հիմնականում շեշտը դրվելու է երիտասարդ հեռանկարային խաղացողների վրա:
-«Նոա Յուրմալան» հանդես է գալու Լատվիայի Բարձրագույն խմբում, այսինքն այլ ակումբի հիմքի վրա՞ է ստեղծվել այն:
-Ակումբը նախկինում կոչվել է «Լոկոմոտիվ Դաուգավպիլս»: Մեր գնելուց հետո տեղի է ունեցել անվանափոխություն:
-Ինչպե՞ս եք ընտրում այն ակումբները, որոնք հետո գնում եք:
-Ունենք հատուկ խնդիրներ, նպատակներ ու դրանք հաշվի առնելով՝ մեր աշխատակիցներն ընտրում են ակումբը, ապա հոլդինգում քննարկումներ են լինում ու վերջնական որոշում է կայացվում:
-Իսկ «Նոայում» ի՞նչ փոփոխություններ են սպասվում. մի քանի ֆուտբոլիստ արդեն հեռացավ թիմից:
-Կան բազմաթիվ ֆուտբոլիստներ, որոնք փորձաշրջան են անցնում և կան նրանք, որոնց հետ պայմանագրեր են կնքվել: Առաջիկայում կհայտարարենք այդ մասին:
-Եղա՞ն այնիպիսի ֆուտբոլիստներ, որոնց ակումբը նոր պայմանագիր առաջարկեց, բայց հրաժարվեցին թեկուզ հենց երկրում ստեղծված իրավիճակից ելնելով:
-Կոնկրետ, թե ինչ պատճառով են հրաժարվել, չեմ կարող ասել, պատճառ չի նշվել: Մեկ ֆուտբոլիստ կար, որին մենք պայմանագիր էինք առաջարկել, բայց նա տեղափոխվեց հայկական այլ ակումբ: Մյուս ֆուտբոլիստներին մենք պայմանագրեր չենք առաջարկել:
-Ֆուտբոլիստներ ձեռք բերելու հետ կապված ինչ-որ կոնկրետ երկրի գործակալությունների հե՞տ եք համագործակցում:
-Ոչ, կոնկրետ գործակալություններ չկան: Կան, որ մեզ առաջարկում են ֆուտբոլիստներ, բայց չկան գործակալություններ, որոնց հետ մշտական աշխատենք: Կամ առաջարկված ֆուտբոլիստներին ենք նայում ու փորձում մեզ հարմար տարբերակ ընտրել, կամ մենք ենք ընտրում կոնկրետ ֆուտբոլիստի ու կապ հաստատում այն գործակալության հետ, որին պատկանում են նրա բանակցային իրավունքները:
-Մարզչի աշխատանքի մասին ի՞նչ կասեք:
-Միայն դրականը կարող եմ ասել: Նախ, մինչ նրա Հայաստան գալը մենք նրան ճանաչում էինք, իսկ հետո գործի մեջ տեսանք դա: Ակումբի ցուցադրած խաղը մեզ գոհացնում էր նրա գլխավորությամբ:
-Շտաբում փոփոխություններ չե՞ն սպասվում:
-Ոչ: Մեր ակումբում ամեն ինչ կարգին է: Ավելին, մարզչական համալրումներ կան, որոնց մասին ևս առաջիկայում կհայտարարենք:
-Մոտ մեկ ամիս առաջ ձեր ակումբը վարձակալեց Վաղարշապատի ֆուտբոլի ակադեմիան, հիմա ո՞ր փուլում են այնտեղ տարվող աշխատանքները:
-Մեկ ամիս է անցել, բայց մենք արդեն անցել ենք գործի: Ամենօրյա ռեժիմով աշխատում ենք այնտեղի աշխատակիցների հետ: Երեխաները, մանկապատանեկան թիմերը ևս սկսել են մարզումները: Մոտ ապագայում տեխնիկական տնօրեն կունենանք, իսկ շինարարական աշխատանքները սպասվում են փետրվարի կեսերից: Այժմ նախագծման փուլն է:
-Առաջիկա էլ ի՞նչ պլաններ ունի ակումբը:
-Ամսի 29-ին մեկնում ենք հավաքի Արաբական Միացյալ Էմիրություններ: Այն կտևի մինչև փետրվարի 12-ը: Նախատեսված են ընկերական հանդիպումներ: 3-ն արդեն նշանակված են, մեկը դեռևս հարցականի տակ է: Ավելի ուշ դրա վերաբերյալ տեղեկություն ևս կհրապարակենք:
Ստելլա Բաբլոյան
