«Լոռի» ՖԱ-ի նախագահ Թովմաս Գրիգորյանը առաջադրվել է ՀՖՖ նախագահի թեկնածու: Ընտրություններից առաջ հաղթելու հնարավոր շանսերի, ֆուտբոլի զարգացման տեսլականի, «Լոռի» ֆուտբոլային ակումբի ապագային առնչվող և այլ հարցերի շուրջ ArmSport.am-ը զրուցել է Գրիգորյանի հետ.
-Պարոն Գրիգորյան, բոլորին հետաքրքրող թեման ՀՖՖ նախագահի ընտրություններն են, որում «Վանաձորի ֆուտբոլի ակադեմիայի կողմից առաջադրվել եք որպես նախագահի թեկնածու: Ինչպե՞ս է ընթանում պայքարը:
-Կա մեծ ֆուտբոլային ընտանիքի կոնսոլիդացիա: Այսպիսի կոնսոլիդացիան «դատապարտված» է հաղթանակի:
-Տոկոսային առումով կգնահատե՞ք Ձեր շանսերը:
-Կանխատեսելն անշնորհակալ գործ է, բայց փորձեմ: Այս պահին 70 և ավելի տոկոսով համախմբում կա իմ և մեր թիմի շուրջ:
-Բնականաբար, հանդիպումներ եք ունենում ՀՖՖ անդամ ՀԿ-ների, հայկական ֆուտբոլային ընտանիքի ներկայացուցիչների հետ: Ինչպե՞ս է ընդհանուր վերաբերմունքը:
-Ընդհանուր պատկերը արտահայտիչ կլինի դեկտեմբերի 6-ից հետո, երբ փաստացի կտրվի բաց քարոզարշավի մեկնարկը: Համարյա բոլոր ՀԿ-ների հետ, բացառությամբ մի քանիսի, քննարկում եղել է: Մեր տեսլականը համընկնում է ՀԿ-ների մեծ մասի նախագահների, ներկայացուցիչների մոտեցումների հետ:
-Նուրբ հարցի մասին եմ ցանկանում խոսել. մամուլում շրջանառվում են տեղեկություններ Ձեր և ՀՖՖ նախկին նախագահ Ռուբեն Հայրապետյանի հետ ջերմ հարաբերությունների մասին: Ֆուտբոլային առումով կա՞ արդյոք որևէ գործակցություն Հայրապետյանի հետ:
-Ֆուտբոլային առումով որևէ գործակցություն չկա. հայտարարում եմ ամենայն պատասխանատվությամբ: Այո, իր հետ ջերմ հարաբերություններ ունեցել եմ, նույն հարաբերություններն ունեմ Սուրեն Աբրահամյանի, Արթուր Վանեցյանի հետ: Ես ֆուտբոլային աշխարհում այնպիսի դիրք ունեմ, որ չի կարող ՀՖՖ նախագահ լինել, որի հետ վատ հարաբերություններ ունենամ: Ներկայիս ֆեդերացիայի անձնակազմը լավ հարաբերությունների մեջ է եղել Հայրապետյանի հետ…: Չի կարելի տարանջատել:
Ես 20 տարի ֆուտբոլում եմ, շատ գումարներ եմ ծախսել այս ընթացքում, ակումբ եմ հիմնել…: Այդ գումարներից օգտվել են նաև տվյալ ժամանակի ֆեդերացիայի աշխատակիցները, ովքեր լավ հարաբերություններ են ունեցել Հայրապետյանի հետ: Այդ ինչպե՞ս ստացվեց, որ ես դարձա իր ջերմ ընկերը, մյուսները` ոչ:
-Այնպես է ստացվել, որ ՀՖՖ նախագահի պաշտոնը, չասենք քաղաքական, բայց քաղաքականության հետ սերտ առնչություն ունեցող պաշտոն է եղել վերջին տարիներին: Համենայն դեպս, ՀՖՖ՝ մեզ հայտնի վերջին 3 նախագահներն անվերապահ աջակցություն են ունեցել ՀՀ ղեկավարության կողմից: Արդյո՞ք այդ գործոնն այժմ որոշիչ դեր ունի և ունե՞ք Դուք բավարար վստահություն երկրի իշխանությունների կողմից:
-Ես վստահ եմ, որ եթե ամեն ինչ հաջող ընթանա և ընտրություններում հաղթենք, կունենանք իշխանությունների աջակցությունը, որովհետև աշխատելու ենք Հայաստանի ֆուտբոլի համար, ծառայելու ենք մեր երկրին: Ամեն ինչ անելու ենք Հայաստանի հարգը բարձրացնելու և ՀՀ քաղաքացու համար դրական աուրա ստեղծելու համար: Այս ամենը, վստահաբար, կլինի երկրի իշխանության հովանու ներքո:
Այս ընտրությունները բացառիկ է նրանով, որ քաղաքական որևէ ճնշում, ցանկության դրսևորում չկա: Ըստ իս՝ այս անգամ ֆուտբոլային ընտանիքը լավ հնարավորություն ունի ընտրելու իր ղեկավարին:
-Նշեցիք 70 և ավելի տոկոս հնարավորությունների մասին: Մյուս 3 թեկնածուներից՝ Արմեն Մելիքբեկյան, Խորեն Հովհաննիսյան, Արսեն Աղաջանյան, կա՞ հիմնական մրցակից:
-Երեքն էլ մրցակից են լինելու, ոչ մեկին չեմ կարող առանձնացնել: Մենք փորձելու ենք լինել կոռեկտ, մրցակցային: Հավասար մրցակիցներ են: Անկեղծ լինեմ, որպես ֆուտբոլային աշխարհի մարդ, «Փյունիկի» թեկնածուին չեմ ճանաչում:
-Արթուր Վանեցյանի ընտրվելուց հետո մշակվել է ֆուտբոլի զարգացման ռազմավարության ծրագիր, որը մոտ մեկ տարի կիրառվել է: Հետաքրքիր է, թե Ձեր ծրագիրը ինչո՞վ կտարբերվի, ի՞նչ նոր բան կլինի այնտեղ:
-Ծրագրերի մեջ կլինեն մեծ տարբերություններ: Եթե իմ ծրագիրը համապատասխաներ առկային, իմ թեկնածությունը չէի դնի: Իմ ծրագրում գլոբալ հարցերի շուրջ 180 աստիճանի տարբերություններ կան:
-Ի՞նչ մանրամասներ կներկայացնեք ծրագրից:
-Նախորդ ընտրություններից առաջ ես գրել էի ծրագիրը: Մոտ մեկ ամիս երկու օգնականների և ընկերոջս հետ աշխատել էի այդ ծրագրի վրա: Հետագայում առաջարկել եմ Վանեցյանին, բայց այդ ծրագրով չաշխատեցին, ընտրեցին այն ծրագիրը, որի արդյունքը տեսնում ենք:
-ՀՖՖ ներկայիս տեխնիկական տնօրինության, տարբեր տարիքային հավաքականների մազիչների հետ Ձեր մտքերը համընկնո՞ւմ են, թե՞ ընտրվելու դեպքում էական փոփոխություններ կլինեն՝ ընդհուպ մինչև Մելենդեսի հետ պայմանագրի խզումը:
-Դա գլխավոր մեխերից մեկն է: Ըստ իս՝ պետք է անդրադառնալ այդ թեմային: Պետք է վերլուծել և հասկանալ, թե Մելենդեսը և իր թիմը այս ընթացքում ի՞նչ են տվել հայկական ֆուտբոլին, պետք է հասկանալ՝ արժե՞ արդյոք այդքան գումարներ ծախսել: Պետք է նժարին դնել ծախսված գումարներն ու արդյունքը:
Մի բան ասեմ. համակեցության կանոն է խախտվում. այդ մարդկանց մեծ գումար է տրվում, հայ մասնագետներին՝ գումարի չափի 1/100-ը…:
-Հայտարարություններից մեկում նշել եք, որ ՀՖՖ նախագահը որևէ առնչություն չպետք է ունենա ֆուտբոլային ակումբի հետ: Մեծ եք գնահատում Ձեր շանսերը, ինչը թույլ է տալիս ենթադրել, որ «Լոռին» վաճառելու հարցում արդեն բանակցություննե՞ր եք վարում…:
-Չեմ ցանկանում շտապել: Այն մարդիկ, ովքեր իմ թեկնածությունը պաշտպանում են, իրենց մոտ կա անհանգստություն: Ես համաձայնել եմ իրենց հետ: «Լոռին» առաջիկա 3 ամսում կվաճառվի: «Լոռին» շարունակ զարգացող բրենդ է՝ իր ենթակառուցվածքներով, երկրպագուների բանակով, մոտեցումներով: Համոզված եմ, որ այն լավ ձեռքերում կլինի:
-Նախորդ տարի Արթուր Վանեցյանն ուներ շատ մեծ աջակցություն, բոլոր ակումբները պաշտպանեցին իր թեկնածությունը, բայց ընդամենը մեկ տարի հետո՝ վստահությունը հասավ զրոյականի: Նա բազմիցս նշել էր, որ մեծածավալ աշխատանքներ են ընթանում, դաշտեր են կառուցվում: Հասկանում ենք, որ որոշիչ դեր ունեցավ նաև ազգային հավաքականի անհաջող խաղը: Այժմ ՀՖՖ առաջիկա նախագահը ի՞նչ պետք է անի, որպեսզի վստահությունը չփոշիանա:
-Իրոք, Վանեցյանը շատ մեծ աջակցություն է ունեցել: Ինքը դե ֆակտո չի կառավարել ՀՖՖ-ն: Ֆուտբոլը մեծ ինդուստրիա է: Ինքը, այսպես ասած, ղեկավարումը հանձնարարել էր իր փոխնախագահներին, որոնցից, արդարացիորեն ասեմ, դժգոհությունը մեծ էր: Այդ պատճառով վստահությունը փոշիացավ:
Մեծ ծրագրեր եղան, բայց… նոր ընտրություններից հետո 3-4 կիսատ գործեր են մնում: Այդ գործերը կարող էին դառնալ մեր ֆուտբոլի զարգացման հիմնաքարերը: 51 փոքր դաշտեր են կառուցել… այստեղ ես տրամաբանություն և արդյունավետություն չեմ տեսնում:
-Որո՞նք էին այդ կիսատ մնացած գործերը:
-Վանաձորի, Հոկտեմբերյանի մարզադաշտերը, Սևանի ակադեմիան… հիշում եմ, նախորդ ղեկավարության օրոք ծանոթացել եմ աշխատանքներին: Այնտեղ մի քանի օրվա աշխատանքներ են մնացել, բայց ոչինչ չի արվել: Ինչու՞ չավարտել այդ գործը…:
-Նշեցինք Մելիքբեկյանի և Նիկողոսյանի գործոնը, որոնք, այսպես ասած, ՀՖՖ-ի բուրգի գագաթն էին: Ձեր ընտրվելու դեպքում գագաթից սկսած մինչև ներքև փոփոխություններ լինելո՞ւ են:
-Ֆուտբոլի ֆեդերացիան ունի պրոֆեսիոնալ անձնակազմ, որի հիմնական մասի հետ փոփոխություն չի լինելու: Փոխնախագահներին էլ ընտրում է ժողովը:
—Վերջում վերադառնանք «Լոռիին», որի հիմնադիրն եք: Ձեզ համար ծանր չի լինի՞ բաժանվել ակումբից:
-Իհարկե շատ ծանր կլինի: Այժմ էլ մտածելիս զգում եմ, որ շատ ծանր է լինելու: Միևնույն ժամանակ գիտակցում եմ, որ մեծ նպատակների համար անհրաժեշտ է ինչ-որ բան զոհել. ես պատրաստ եմ դրան:
Ես համաձայն չեմ, որ մեր ֆուտբոլը հոգեվարքի մեջ է, համաձայն եմ, որ ծանր վիճակում է: Ունենալով լուծման բանալիները՝ գնում եմ այդ որոշմանը:
-Իսկ եթե իրադարձությունները զարգանան այնպես, որ չգտնեք բավարար սրտացավ և ունակ մարդ «Լոռիի» համար…
-Չեմ կարծում, թե էդպես կլինի: Վստահ եմ, որ կգտնեմ: «Լոռին» ոչ միայն ֆուտբոլային թիմ է, այլև բրենդ մարզի ու երկրի համար: Ցանկացած խելացի, ֆուտբոլային գործիչ կցանկանա ձեռք բերել ակումբը:
Արման Առաքելյան
