Կորոնավիրուսի համավարակով պայմանավորված կարանտինից հետո մարզաշխարհը հետզհետե վերադառնում է բնականոն կյանքին: Մի շարք մարզաձևերում արդեն սկսվել են մարզումներն ու ուսումնամարզական հավաքները:
Այս օրերին Ծաղկաձորում ուսումնամարզական հավաք է անցկացնում բռնցքամարտի Հայաստանի երիտասարդական հավաքականը՝ մարզիչ Կարեն Աղամալյանի գլխավորությամբ:
«Հավաքը սկսել ենք հուլիսի 21-ին և կավարտենք օգոստոսի 2-ին: Հավաքին մասնակցում է 21 մարզիկ՝ 15 տղա, 6 աղջիկ: Մարզչական թիմում է նաև երիտասարդական հավաքականի 2-րդ մարզիչ Գարիկ Բաղդասարյանը, ինչպես նաև աղջիկների հավաքականի գլխավոր մարզիչ Խաչիկ Խաչատրյանն ու 2-րդ մարզիչ Նվեր Վարդանյանը»,-մեզ հետ զրույցում նշեց Կարեն Աղամալյանը:
Այս տարվա ապրիլին պետք է կայանար երիտասարդների ԵԱ-ն: Տարվա կարևորագույն ստուգատեսերից մեկին նախապատրաստվելու համար Կարեն Աղամալյանի գլխավորած թիմը մարտին հավաք էր անցկացնում Թբիլիսիում:
«Թբիլիսյան հավաքը շատ լավ անցավ: Վրաստանից վերադարձանք և սկսվեց երկրում արտակարգ դրության ռեժիմը: Այս ընթացքում մենք մարզվում էինք բացօթյա: Տղաների աշխատելու ցանկությունը մեծ է: Հիմա դադարից հետո առաջին հավաքն ենք անցկացնում և աշխատում ենք ամբողջ ծանրաբեռնվածությամբ՝ պահպանելով անվտանգության բոլոր կանոնները: Արդեն կարող եմ ասել, որ առաջին հավաքն ամբողջությամբ ծառայեց իր նպատակին: Հավաքից հետո տղաները կմարզվեն իրենց անձնական մարզիչների հետ, բայց շաբաթը երկու անգամ թիմային մարզում կանցկացնենք՝ հնարավորինս քիչ անձակազմով »,-ասաց Աղամալյանը:
Առաջիկա մրցաշարերի մասին դեռևս ոչ մի հստակ տեղեկություն չկա.
«Երիտասարդների Աշխարհի առաջնությունը կանցկացվի հաջորդ տարի: Եվրոպայի առաջնության մասին տեղեկություն չունենք: Ես ամեն օր կապի մեջ եմ եվրոպական ֆեդերացիայի հետ, և ինձ հայտնում են, որ դեռ ամեն ինչ անորոշ է կապված մրցումների անցկացման ժամկետների հետ: Ամեն դեպքում, Եվրոպայի առաջնությանը նախապատրաստվելու համար այս պահին անհրաժեշտ է գոնե 3 ամիս, որպեսզի բռնցքամարտիկները հասնեն իրենց լավագույն մարզավիճակին»,-եզրափակեց Կարեն Աղամալյանը:
Երվանդ Հակոբյան
