Ավարտին է մոտենում թենիսային հերթական մրցաշրջանը։ 2019-ը խելահեղ տարի էր թենիսի աշխարհում, թեպետ ո՞ր տարին այսպիսին չի լինում։
Ողջու՜յն։ Այսօր խոսելու ենք Nitto ATP Finals-ի, կամ որ նույնն է՝ ATP-ի տարվա ամփոփիչ մրցաշարի մասին։ Լոնդոնում անցկացվող մրցաշարին մասնակցում են տվյալ տարվա լավագույն ութ թենիսիստները, որոնք ATP-ի մրցաշարերում և Մեծ Սաղավարտերում բոլորից շատ միավորներ են հավաքել տարվա կտրվածքով։
Այս տարի Nitto ATP Finals-ում են Նովակ Ջոկովիչը, Ռաֆայել Նադալը, Ռոջեր Ֆեդերերը, Դանիլ Մեդվեդևը, Դոմինիկ Տիմը, Ստեֆանոս Ցիցիպասը, Ալեքսանդր Զվերևը և Մատեո Բերետինին։
Միավորների հավաքման գործընթացը թենիսում այնքան հետաքրքիր է, որ Ցիցիպասի տեղը ամփոփիչում ապահովել է Մեդվեդևը, իսկ Բերետինիինը՝ Շապովալովը։ Կանադացին հույս ուներ, որ իտալացին այս իրադարձությունից հետո իրեն գարեջուր է հյուրասիրելու։
Պետք է իմանալ, որ տարվա ամփոփիչ մրցաշարում վարկանիշային մեծ միավորներ են խաղարկվում։ Եթե ATP-ի մրցաշարերը լինում են 250, 500, և Մասթերս-1000 շարքերի, ապա այստեղ միանգամից 1500 միավոր է խաղարկվում։ Grand Slam-երում, իհարկե, այլ պատմություն է։ Այնտեղ 2000 միավոր է սեղանին դրված։
Մրցաշարի անցկացման կարգը շատ պարզ է։ Կա երկու խումբ՝ յուրաքանչյուրում չորսական մասնակից։ Խմբի լավագույն երկու թենիսիստները դուրս են գալիս կիսաեզրափակիչ։
Մրցաշարում նորեկներ են Ստեֆանոս Ցիցիպասը, Դանիլ Մեդվեդևը և Մատեո Բերետինին: Երեք թենիսիստներն էլ խելահեղ մրցաշրջան են անցկացրել։ Իհարկե, ամենատպավորիչը Դանիլինն էր։ Մասթերսի երկու տիտղոս, Grand Slam-ի մեկ եզրափակիչ, բազմաթիվ ռեկորդներ։ Բերետինին մրցաշրջանի երկու հատվածում շատ վառ թենիս ցուցադրեց։ Խոտածածկ կորտերի վրա իտալացին շատ լավ տեսք ուներ, իսկ մրցաշրջանի մայրամուտին բացվեց ու սկսեց ճախրել Flushing Meadows-ում՝ հասնելով US Open-ի կիսաեզրափակիչ։
Հնաբնակներից այստեղ են Ռոջերը, Ռաֆան, Նովակը։ Տիմն ու Զվերևը ևս մրցաշարում խաղալու փորձ ունեն։ Սաշան մրցաշարի գործող չեմպիոնն է։ Այս տարի նրա շանսերը այդքան էլ մեծ չեն։
Հատկանշական է, որ ATP-ի տարվա ամփոփիչ մրցաշարում կարիերայի ընթացքում ոչ մի անգամ չի հաղթել Ռաֆայել Նադալը։ Իսպանացին այս մրցաշարին մոտենում է վնասվածքով։ Դեռևս հայտնի չէ, թե ինչ վիճակով նա կորտ դուրս կգա երկուշաբթի։
Անցնենք խմբերին։ Լեգենդար Անդրե Աղասիի և Բյորն Բորգի անունները կրող խմբերը բաշխվել են հետևյալ կերպ․
Անդրե Աղասիի խումբ
Ռաֆայել Նադալ (Իսպանիա)
Դանիլ Մեդվեդև (Ռուսաստան)
Ստեֆանոս Ցիցիպաս (Հունաստան)
Ալեքսանդր Զվերև (Գերմանիա)
Բյորն Բորգի խումբ
Նովակ Ջոկովիչ (Սերբիա)
Ռոջեր Ֆեդերեր (Շվեյցարիա)
Դոմինիկ Տիմ (Ավստրիա)
Մատեո Բերետինի (Իտալիա)
Ո՞վ է գլխավոր ֆավորիտը։ Մրցաշարը իսկական տոն է երկրպագուների համար։ Այսքան լավ հանդիպումներ կարող ենք չտեսնել նույնիսկ Մեծ սաղավարտի մրցաշարերում։ Կարծում եմ՝ մրցաշարին շատ լավ կարգավիճակով է մոտենում Դանիլ Մեդվեդևը։ Ռուս թենիսիստը Փարիզի Մասթերսում շուտ լքեց պայքարը ու թերևս բոլորից լավ է պատրաստվել մրցաշարին։ Հակասական է Դոմինիկ Տիմի վիճակը։ Նա ասիական հատվածը գերազանց անցկացրեց, հետո հաղթեց Վիեննայում, բայց Փարիզում շատ հոգնած տեսք ուներ։ Զվերևը եկել է տիտղոսը պաշտպանելու, սակայն այս անգամ կրկնակի բարդ է լինելու։
Ցիցիպասը Փարիզում ուղղակի կոտրվեց Ջոկովիչի դեմ խաղում։ Հույն թենիսիստը, սակայն, թոփերի հետ լավ է խաղում՝ չնայած սերբի դեմ Փարիզում կայացած խաղին։ Ջոկովիչը լավ վիճակում է։ Հերթական տիտղոսը Փարիզում ու հիմա էլ ամփոփիչ մրցաշար։ Թերևս գլխավոր ֆավորիտը նա է։
Ֆեդերերը բազմաթիվ ակնարկային հայտարարություններից հետո վերադառնում է կորտ։ Շվեյցարացին Բազելում 10-րդ հաղթանակից հետո որոշեց հանգստանալ։ Էմոցիոնալ առումով շատ հագեցած շաբաթ էր։ Ֆեդերերը վերադառնում է կորտ ու հաստատ պայքարելու է։
Նադալը ունի վնասվածք, ու անկեղծ, սպասելիքները մեծ չեն։ Դե իսկ ահա Բերետինին մրցաշրջանի մեկնարկում դժվար թե կպատկերացներ, որ լինելու է այստեղ, բայց նա հաստատ կռիվ է տալու ցանկացած խաղում։
Թենիսային գերհագեցած շաբաթվա ընթացքում Armsport-ն իր դիտակետում է պահելու մոլորակի ամենաչքնաղ քաղաքներից մեկը։ Ու թեպետ Բորիս Ջոնսոնն ու բրիտանացիները շարունակում են պայքարը հասունացող Բրեքսիթի համար, Լոնդոնը գալիք շաբաթ լինելու է հենց թենիսի կենտրոնակայանը․․․
Արամ Սահակյան
