ՈւԵՖԱ-ի Կոնֆերենցիաների լիգայի որակավորման երկրորդ փուլի «Ալաշկերտ» — «Կլուժ» առաջին հանդիպման նախօրեին կայացել է գլխավոր մարզիչ Վահե Գևորգյանի մամուլի ասուլիսը։
«Նախ, օգտվելով ընձեռված հնարավորությունից, ցանկանում եմ շնորհակալություն հայտնել մեր երկրպագուներին: Նախորդ խաղից հետո հոգնածության և հաղթական էմոցիաների պատճառով չհասցրի դա անել։ Նրանք հազարավոր կիլոմետրեր էին անցել մեզ աջակցելու համար և իսկապես մեծ գործ արեցին։ Խնդրում եմ, որ այս խաղին ևս շատ աջակիցներ ունենանք։ Հավանաբար, նախորդ հանդիպման ապահոված դրաման կնպաստի, որ տրիբունաներն ավելի մարդաշատ լինեն։
Ինչ վերաբերում է ձեր հարցին, այո՛, համաձայն եմ։ Հաճախ է պատահում, որ նման լարված խաղից հետո թիմը շատ էմոցիա է թողնում դաշտում, ինչն ազդում է հաջորդ հանդիպման վրա։ Բայց գաղտնիք չէ, որ ֆուտբոլն էմոցիոնալ մարզաձև է, և առանց էմոցիայի պետք չէ խաղալ: Մենք աշխատել և շարունակում ենք աշխատել այդ ուղղությամբ։ Մենք միշտ էլ կրքով ենք գործում, և վստահ եմ՝ վաղը նույնպես դաշտում կտեսնեք այդ էմոցիաներն ու կիրքը։ Շատ լավ խաղ է լինելու։
— Ի՞նչ կասեք «Կլուժի» մասին։ Հավանաբար դիտել եք չորս տարի առաջ «Փյունիկի» դեմ նրանց հանդիպումները։ Ընդհանրություններ կա՞ն այն ժամանակվա և ներկայիս «Կլուժի» միջև։
— «Փյունիկի» դեմ հանդիպումները բավականին վաղուց են կայացել։ Այդ ժամանակից ի վեր շատ բան է փոխվել, այդ թվում՝ գլխավոր մարզիչը, ուստի ես մանրամասն չեմ ուսումնասիրել հենց այդ խաղերը։ Մենք շատ լավ վերլուծել ենք ներկայիս մրցակցին։ «Կլուժն» արդեն անցկացրել է Ռումինիայի առաջնության առաջին հանդիպումը։ Այն շատ ուժեղ թիմ է, և բոլորս հիանալի գիտենք, թե ակումբն ինչ հարուստ պատմություն ունի։ Մենք հարգում ենք մրցակցին, բայց ոչ մեկից չենք վախենում։
— Թիմը պատրա՞ստ է հանդիպմանը։ Վնասվածք ունեցող ֆուտբոլիստներ կա՞ն։
— Մենք լիովին պատրաստ ենք հանդիպմանը։
Հիշեցնենք, որ հանդիպումը կկայանա այսօր՝ հուլիսի 23-ին, 19։00-ին։
Ասուլիսն ամբողջությամբ՝ ստորև․
