Անգլիական «Մանչեսթեր Սիթիի» և Անգլիայի ազգային հավաքականի կիսապաշտպան Ֆիլ Ֆոդենը նոր՝ քառամյա պայմանագիր է կնքել ակումբի հետ, որի համաձայն ֆուտբոլիստը «Էթիհադում» կմնա մինչև 2030 թվականը։
26-ամյա ֆուտբոլիստը, ով մանկուց երկրպագել է «Սիթիին», ակումբի ակադեմիային միացել է դեռևս 9 տարեկանում։ 2017 թվականին Պեպ Գվարդիոլայի գլխավորությամբ նորամուտը նշելուց հետո Ֆոդենը դարձել է ակումբի պատմության ամենատիտղոսակիր խաղացողներից մեկը՝ Բեռնարդու Սիլվայի և Ջոն Սթոունզի հետ միասին:
«Մանչեսթեր Սիթիի» կազմում Ֆիլ Ֆոդենի գրանցած գլխավոր ձեռքբերումներն իսկապես տպավորիչ են: Իր ելույթների ընթացքում նա հասցրել է նվաճել 20 խոշոր տիտղոս, որոնց թվում են Պրեմիեր լիգայի 6 չեմպիոնությունն ու Չեմպիոնների լիգայի գավաթը։
Թիմային հաջողություններից զատ, անգլիացի ֆուտբոլիստն արժանացել է նաև հեղինակավոր անհատական մրցանակների. մասնավորապես, 2023/24 մրցաշրջանում նա ճանաչվել է Պրեմիեր լիգայի լավագույն խաղացող, ինչպես նաև PFA-ի և FWA-ի վարկածով տարվա լավագույն ֆուտբոլիստ։
Բացի այդ, Ֆոդենը գրանցել է կարևոր պատմական ցուցանիշներ. 2026 թվականի մայիսին նա դարձավ «Սիթիի» 132-ամյա պատմության 20-րդ ֆուտբոլիստը, որը հատեց 100 գոլի սահմանագիծը, ինչպես նաև դարձավ այն 6 բացառիկ խաղացողներից մեկը, որը Պրեմիեր լիգայում աչքի է ընկել 100 արդյունավետ գործողությամբ (գոլ և գոլային փոխանցում)։
Անդրադառնալով նոր պայմանագրին և ակումբի նորանշանակ գլխավոր մարզիչ Էնցո Մարեսկային՝ Ֆոդենը նշել է, որ ապրում է իր մանկության երազանքը.
«Ապագաս «Սիթիի» հետ կապելն ինձ համար ամեն ինչ է։ Այս ակումբում խաղալն այն միակ բանն է, ինչ ես միշտ ցանկացել եմ: Հասկանում եմ, որ բախտս բերել է դառնալու այս պատմական ժամանակաշրջանի մի մասը, բայց մենք միշտ նայում ենք առաջ՝ ցանկանալով ավելին։
Անհամբերությամբ եմ սպասում Էնցո Մարեսկայի հետ կրկին աշխատելուն: Նա հիանալի էր Տրեբլի մրցաշրջանում, բոլոր ֆուտբոլիստները հարգում են նրան: Մենք ունենք հաղթողի մտածելակերպ և արդեն իսկ առաջին մարզումներից երևում է, որ թիմը քաղցած է նոր տիտղոսների»:
«Սիթիի» ֆուտբոլի գծով տնօրեն Ուգո Վիանան ևս իր գոհունակությունն է հայտնել կիսապաշտպանի հետ համագործակցության շարունակման կապակցությամբ.
«Ֆիլը ներկայացնում է այն ամենալավը, ինչ կա մեր ակադեմիայում: Նա բացառիկ տաղանդ է, բայց այս ամենն անհնար կլիներ առանց նրա նվիրվածության ու համեստության։ 26 տարեկանում նրա զարգացումը դեռ շարունակվում է, և մենք անհամբերությամբ սպասում ենք տեսնելու, թե ինչպիսի խաղացող նա կդառնա առաջիկա տարիներին»:
