Կատալոնական «Բարսելոնան» լրջորեն դիտարկում է «Ռասինգ Սանտանդերի» 19-ամյա կենտրոնական պաշտպան Խորխե Սալինասի տրանսֆերը ձեռք բերելու տարբերակը։ Այս մասին հայտնում է հեղինակավոր Mundo Deportivo պարբերականը։
Երիտասարդ ֆուտբոլիստն ընթացիկ մրցաշրջանում տպավորիչ խաղ է ցուցադրել Իսպանիայի երկրորդ դիվիզիոնում (Սեգունդա)։ Սալինասը մասնակցել է 32 հանդիպման և առանցքային դերակատարում ունեցել իր թիմի՝ Լա Լիգայի ուղեգիր նվաճելու հարցում։
«Բարսելոնայի» սկաուտական բաժինն արդեն տևական ժամանակ հետևում է պաշտպանի ելույթներին և նրա վերաբերյալ բացառապես դրական զեկույցներ է ներկայացրել ակումբի ղեկավարությանը։
Այնուամենայնիվ, տրանսֆերի վերջնական իրականացումը կախված կլինի կատալոնական ակումբի ներքին կադրային վերադասավորումներից և տրանսֆերային շուկայում ստեղծված ընդհանուր իրավիճակից։
Խորխե Սալինասի գործող պայմանագիրը «Ռասինգի» հետ նախատեսված է մինչև 2029 թվականի ամառը։ Հատկանշական է, որ ֆուտբոլիստի պայմանագրում ներառված է հրաժարագնի կետ, որը կազմում է ընդամենը 10 միլիոն եվրո, ինչը բավականին հասանելի գումար է «կապտանռնագույնների» համար։
