Ալբանիայի մայրաքաղաք Տիրանայում անցկացվող Ըմբշամարտի եվրոպական կոնգրեսի շրջանակում Հայաստանի հավաքականի առաջատար Մալխաս Ամոյանը պաշտոնապես ճանաչվել է 2025 թվականի Եվրոպայի լավագույն հունահռոմեական ոճի ըմբիշ: Այս հեղինակավոր որոշման մասին հայտնել է Ըմբշամարտի միջազգային ֆեդերացիայի (UWW) մամուլի ծառայությունը, տեղեկությունը հաստատել է նաև Հայաստանի ըմբշամարտի ֆեդերացիան:
27-ամյա մարզիկի համար նախորդ մրցաշրջանը տպավորիչ էր ու անխոցելի։ Փարիզի Օլիմպիական խաղերի բրոնզե մեդալակիր, աշխարհի կրկնակի ու Եվրոպայի քառակի չեմպիոնն անցյալ տարի պաշտոնական գորգի վրա ոչ մի պարտություն չի ունեցել: Ամոյանի նվաճումների շարքը 2025 թվականին ընդգրկում է աշխարհի ու Եվրոպայի առաջնությունների ոսկե մեդալները, ինչպես նաև Վարշավայի հեղինակավոր «Poland Open» մրցաշարի հաղթողի տիտղոսը:
Հատկանշական է, որ լավագույնի կոչումը հայ ըմբիշն ստանում է տարվա գլխավոր ստուգատեսներից մեկի նախաշեմին: Ապրիլի 20-ին Տիրանայում մեկնարկում է Եվրոպայի առաջնությունը, որտեղ առաջինը պայքարի մեջ կմտնեն հենց հունահռոմեական ոճի ներկայացուցիչները: Արդեն մրցավայրում գտնվող Ամոյանի գլխավոր նպատակն այստեղ Եվրոպայի իր 5-րդ տիտղոսի նվաճումն է:
Հիշեցնենք, որ նույն կոնգրեսի ընթացքում տարվա լավագույնի դափնուն էր արժանացել նաև հունահռոմեական ոճի ըմբշամարտի Հայաստանի հավաքականի գլխավոր մարզիչ Արմեն Բաբալարյանը՝ ճանաչվելով 2025 թվականի Եվրոպայի լավագույն մարզիչ։
