«Մինեսոտա Յունայթեդի» կիսապաշտպան Խամես Ռոդրիգեսը շարունակում է ապաքինվել ուժեղ ջրազրկման պատճառով հոսպիտալացվելուց հետո։ 34-ամյա ֆուտբոլիստի ինքնազգացողությունը վատացել էր Կոլումբիայի հավաքականի՝ Ֆրանսիայի դեմ ընկերական խաղից հետո (1:3), որտեղ նա խաղադաշտ էր դուրս եկել մեկնարկային կազմում և փոխարինվել 63-րդ րոպեին։
EL TIEMPO-ի հաղորդմամբ՝ խաղից անմիջապես հետո ֆուտբոլիստին առաջին բուժօգնություն են ցուցաբերել հանդերձարանում, ինչից հետո նա վերադարձել է Մինեսոտա և մի քանի օրով հոսպիտալացվել։ Նշվում է, որ խաղացողի մոտ ախտորոշվել է ստամոքսի վիրուսային վարակ, որը բարդացել է ջրազրկման ֆոնին։
Այդ ժամանակվանից ի վեր Ռոդրիգեսը խաղադաշտ դուրս չի եկել։ «Մինեսոտա Յունայթեդի» գլխավոր մարզիչ Քեմերոն Նոուլզը նշել է, որ Կոլումբիայի հավաքականի ավագն ապաքինվում է տանը՝ ակումբի բժիշկների հսկողության ներքո.
«Խամեսի վիճակը փոխվում է օրեցօր։ Նա մեր բժշկական անձնակազմի վերահսկողության տակ է և այժմ ապաքինվում է տանը։ Բժիշկները մշտական կապի մեջ են նրա հետ և աստիճանաբար կվերադարձնեն նրան մարզումների, հենց որ նա պատրաստ լինի։
Նա բաց թողեց նախամրցաշրջանային պատրաստությունը, իսկ հետո առաջացավ այս խնդիրը։ Բայց եթե խոսենք թիմում նրա ինտեգրման, պրոֆեսիոնալիզմի և ազդեցության մասին, ապա դա իսկապես ակնառու օրինակ է։ Նա ամեն օր քրտնաջան աշխատում է, և մենք ակնկալում ենք, որ նա շուտով կվերադառնա շարք»,- Նոուլզի խոսքերն է մեջբերում աղբյուրը։
