Լոնդոնի «Չելսիի» և Իսպանիայի ազգային հավաքականի եզրային պաշտպան Մարկ Կուկուրելյան հայտարարել է, որ ապագայում դիտարկում է կատալոնական «Բարսելոնա» վերադառնալու տարբերակը։
«Կրկի՞ն կրել «Բարսելոնայի» մարզաշապիկը: Իսպանիան միշտ իմ տունն է եղել: Վերադառնալու մտքեր հաճախ են լինում, բայց ես չեմ ցանկանում շտապել ու դա կհետաձգեի ևս մի քանի տարով: Այս պահին ես ինձ շատ հարմարավետ եմ զգում Անգլիայի Պրեմիեր լիգայում։ Այնուամենայնիվ, եթե նման առաջարկ լինի, այն մերժելը չափազանց բարդ կլինի: Ես ստիպված կլինեմ մանրամասնորեն ծանրութեթև անել բոլոր հանգամանքները: Եթե ճակատագիրն այդպես տնօրինի, ուրեմն այդպես էլ պետք է լինի», — ֆուտբոլիստի խոսքերն է մեջբերում The Touchline-ը։
Հիշեցնենք, որ Կուկուրելյան «Բարսելոնայի» ակադեմիայի սան է, թեև «կապտանռնագույնների» հիմնական կազմում նա անցկացրել է ընդամենը մեկ պաշտոնական հանդիպում: Պաշտպանի նորամուտը կայացել է 2017 թվականի հոկտեմբերին՝ Իսպանիայի գավաթի խաղարկության «Մուրսիայի» դեմ խաղում: Արդեն 2018-ի ամռանը նա վարձավճարով տեղափոխվեց «Էյբար», որտեղ էլ նշեց իր նորամուտը իսպանական Լա Լիգայում՝ մրցելով «Էսպանյոլի» դեմ։
Իսպանացի պաշտպանը «Չելսիի» շարքերը համալրել է 2022 թվականի օգոստոսին՝ տեղափոխվելով «Բրայթոնից»: Ակումբի հետ նրա գործող պայմանագրի ժամկետն ուժի մեջ է մինչև 2028 թվականի ամառը:
