Մադրիդի «Ռեալի» նախկին կիսապաշտպան Կլարենս Զեեդորֆը մեկնաբանել է Վինիսիուս Ժունիորի նկատմամբ ռասիստական դրսևորումների և դրանց վերաբերյալ Ժոզե Մոուրինյուի արձագանքի շուրջ ստեղծված իրավիճակը:
Հիշեցնենք, որ փետրվարին կայացած Չեմպիոնների լիգայի «Բենֆիկա» — «Ռեալ» (0:1) հանդիպման ժամանակ բրազիլացի հարձակվողը դեղին քարտ էր ստացել գոլը յուրօրինակ տոնելու և Ջանլուկա Պրեստիանիի հետ կոնֆլիկտի համար: Վինիսիուսը հայտարարել էր, որ «Բենֆիկայի» ֆուտբոլիստն իրեն «կապիկ» է անվանել։ Հանդիպումը ժամանակավորապես դադարեցվել էր՝ ռասիզմի դեմ պայքարի արձանագրության համաձայն:
Խաղից հետո Ժոզե Մոուրինյուն նշել էր. «Ինչ-որ բան այն չէ։ Յուրաքանչյուր մարզադաշտում, որտեղ նա խաղում է, միշտ ինչ-որ բան պատահում է»։
«Մեզ զարմացրեց այն, թե ինչ ասաց Ժոզեն և ինչպես նա դա արտահայտեց։ Նա հիանալի հաղորդակցվող է և վառ անհատականություն սպորտային աշխարհում: Սպորտում բազմազանությունը միշտ ողջունվում է խաղադաշտում, և մենք ցանկանում ենք, որ այդ մթնոլորտը բարելավվի: Եվ երբ նման մակարդակի մարդն անում է նման հայտարարություն… Մոուրինյուն սխալ թույլ տվեց»,- նշել է Զեեդորֆը:
Նիդեռլանդացի լեգենդը նաև հավելել է, որ պորտուգալացի մասնագետը հետագայում ուղղել է իր սխալը (Մոուրինյուն հայտարարել էր, որ եթե Պրեստիանին մեղավոր լիներ, այլևս երբեք չէր խաղա «Բենֆիկայի» կազմում), ինչը, ըստ Զեեդորֆի, նորմալ է:
«Հենց այդպես էլ պետք է վարվել. եթե ինչ-որ մեկը սխալ բան է անում, մենք պետք է ուղղենք նրան: Հնարավոր է՝ վաղը ես էլ սխալվեմ, և եթե դա վնասի ուրիշներին, ինձ պետք կլինի մատնացույց անել դա»,- եզրափակել է նախկին ֆուտբոլիստը:
