Հունական ֆուտբոլը սգում է ծանր կորուստ։ ՊԱՕԿ-ի յոթ երկրպագուներ ողբերգականորեն մահացել են միկրոավտոբուսի վթարի հետևանքով, երբ ուղևորվում էին Ֆրանսիա՝ ներկա գտնվելու Եվրոպա լիգայի շրջանակում «Լիոնի» դեմ կայանալիք հանդիպմանը։
Միջադեպը տեղի է ունեցել երեքշաբթի օրը՝ ժամը 13:00-ի սահմաններում, Ռումինիայի տարածքում։ Միկրոավտոբուսը, որում գտնվել է 10 երկրպագու, ճակատային բախում է ունեցել բեռնատարի հետ։ Բացի զոհերից, ևս երեք ուղևոր ստացել է ծանր մարմնական վնասվածքներ։
Հունաստանի վարչապետ Կիրիակոս Միցոտակիսը հայտնել է, որ «խորապես ցնցված է» տեղի ունեցածից և իր անկեղծ ցավակցությունն է հայտնել զոհվածների ընտանիքներին ու ՊԱՕԿ-ի համայնքին։
ՊԱՕԿ-ի նախագահ Իվան Սավիդին հանդես է եկել հուզիչ հայտարարությամբ՝ նշելով, որ անասելի ողբերգություն է թակել ակումբի դուռը.
«Ես ավերված եմ երիտասարդների՝ մեր սիրելի թիմի երկրպագուների անարդար կորստից, ովքեր ճանապարհ էին ընկել՝ սատարելու իրենց ՊԱՕԿ-ին։ Սգում եմ նրանց ընտանիքների և մեր միլիոնավոր հայրենակիցների հետ։ Թող Աստված հանգստություն տա նրանց հոգիներին։
Այս երեխաները ՊԱՕԿ-ի երեխաներն են, նրանք մեր մեծ ընտանիքի անդամներն են։ Իսկ մենք ամեն ինչ անում ենք մեր ընտանիքի համար և ոչ ոքի մենակ չենք թողնում։ Աղոթում եմ, որ ամեն ինչ բարեհաջող ավարտվի նրանց համար, ովքեր վիրավոր են և այս ժամերին կենաց-մահու պայքար են մղում»։
Ակումբը ներկայացուցիչներ է գործուղել Ռումինիա՝ տուժածներին տեղում աջակցություն ցուցաբերելու համար։
Հարյուրավոր երկրպագուներ հավաքվել են Սալոնիկի «Տումբա» մարզադաշտի մոտ՝ մոմեր վառելու, ինչպես նաև ակումբային շարֆեր ու դրոշներ թողնելու համար։ Ակումբի մարզիչները, ֆուտբոլիստներն ու պաշտոնյաները ևս ծաղիկներ են խոնարհել ի հիշատակ զոհվածների։ ՊԱՕԿ-ը սգո նշան է տեղադրել սոցիալական ցանցերի իր բոլոր էջերում՝ հրապարակելով հուզիչ ուղերձ. «Ժամանակը կանգ է առել… Միայն մեկ ցանկություն կա՝ այլևս երբեք…»:
Ըստ Greek City Times-ի՝ չնայած ՊԱՕԿ-ի խնդրանքին, ՈւԵՖԱ-ն որոշել է չհետաձգել հինգշաբթի օրը նախատեսված հանդիպումը։ Կառույցը ցավակցություն է հայտնել տուժածներին և նշել, որ կիսում է ՊԱՕԿ-ի վիշտը։
«Լիոնը» պաշտոնապես հաստատել է, որ կայանալիք խաղից առաջ հատուկ արարողությամբ կհարգի զոհված երկրպագուների հիշատակը։
