Լեվերկուզենի «Բայերի» կիսապաշտպան Ռոբերտ Անդրիխը խոստովանել է, որ անձամբ է խնդրել Ֆլորիան Վիրցին չտեղափոխվել Մյունխենի «Բավարիա»:
Թեև մյունխենյան գրանդը երկար ժամանակ համարվում էր «դեղագործների» աստղի ձեռքբերման գլխավոր հավակնորդը, հարձակողական ոճի կիսապաշտպանն ի վերջո ընտրություն կատարեց հօգուտ անգլիական «Լիվերպուլի»:
«Ես իսկապես կարծում էի, որ Ֆլորիանը պատրաստվում է տեղափոխվել «Բավարիա»: Ինչ-որ պահի ես նրան ասացի. «Խնդրում եմ, մի՛ արա դա, մի՛ վարվիր մեզ հետ այդպես»։
Այո, Բունդեսլիգայի համար շահավետ է, երբ լավագույն գերմանացի խաղացողները մնում են Գերմանիայում, բայց, ի վերջո, երբ խոսքը նման մակարդակի ֆուտբոլիստների մասին է, հայրենիքում նրանց համար մնում է միայն մեկ տարբերակ՝ «Բավարիան»: Ես ցանկանում էի, որ Վիրցը տեղափոխվի արտասահմանյան առաջնություն: Այդ մասին ասել էի նաև «Բավարիայի» տղաներին: Չէի կարծում, որ նա այդքան վաղ տարիքում կորոշի հեռանալ, բայց ինձ ուրախացրեց այդ քայլը», — Անդրիխի խոսքերն է մեջբերում Bayern & Germany-ն:
Հիշեցնենք, որ «Լիվերպուլը» ձեռք է բերել Ֆլորիան Վիրցի տրանսֆերային իրավունքները 2025 թվականի ամռանը՝ 125 մլն եվրոյի դիմաց:
