«Բարսելոնայի» գլխավոր մարզիչ Հանս-Դիտեր Ֆլիկն ամփոփել է Իսպանիայի գավաթի խաղարկության 1/8 եզրափակիչում «Ռասինգի» նկատմամբ տարած հաղթանակը (2:0)։
Գերմանացի մասնագետը գոհունակություն է հայտնել Սանտանդերում իր թիմի ելույթից և առանձնահատուկ գովեստի խոսքեր ուղղել «էլեկտրական» Ֆերմին Լոպեսին։
Հանսի Ֆլիկը հետխաղյա մամուլի ասուլիսին ներկայացել է բավականին կարճ՝ պայմանավորված թիմի լոգիստիկ շտապողականությամբ։ «Բարսելոնան» պետք է արագ վերադառնար օդանավակայան, քանի որ Սանտանդերի օդանավակայանը բացառություն էր արել՝ թույլատրելով կատալոնական ակումբի ինքնաթիռի թռիչքը, որպեսզի կարիք չլինի մեկնել այլ քաղաք։
Մարզչին հարցրել են՝ արդյոք նախկինում ունեցե՞լ է Ֆերմինի էներգիայով և ազդեցությամբ ֆուտբոլիստ։
«Նա շատ յուրահատուկ է։ Ինձ դուր է գալիս նրա վերաբերմունքն ու դինամիկան։ Նա կատարում է գոլային փոխանցումներ, խփում է գոլեր և այն ֆուտբոլիստն է, որը մեզ շատ է օգնում»,- վստահեցրել է Ֆլիկը։
Խոսելով Ժոան Գարսիայի՝ մեկնարկային կազմում հայտնվելու մասին՝ Ֆլիկը բացատրել է, որ նա խաղացել է, «քանի որ մենք այդպես ենք որոշել, և դա ճիշտ որոշում էր»։ Այնուամենայնիվ, նա բաց է թողել փոփոխությունների հնարավորությունը Իսպանիայի գավաթի հաջորդ խաղի համար. «Վերջում կտեսնենք, թե ով կխաղա հաջորդ հանդիպմանը։ Դեռ ոչինչ չենք որոշել։ Կարող են լինել փոփոխություններ՝ կախված նաև հոգնածությունից»,- նշել է նա՝ հավելելով, որ մեկնարկային կազմերը որոշում է մարզչական շտաբի հետ համատեղ՝ հիմնվելով մարզումների արդյունքների վրա։
Գերմանացի մասնագետը նաև նշել է, որ նկատելի աճ է տեսնում գավաթային մրցակիցների մակարդակում․
«Մրցակիցներն այս խաղերին մոտենում են առանց վախի։ Նրանք համարձակ են և կորցնելու ոչինչ չունեն։ Դա ֆանտաստիկ է և մեծ արժեք ունի, հենց այդ պատճառով էլ շատ ուրախ եմ, որ անցանք հաջորդ փուլ»։
Անդրադառնալով «Ռասինգի» երկու չհաշվված գոլերին (խաղից դուրս վիճակ), գերմանացին կարևորել է պաշտպանական գծի բարձր մակարդակը, որն օգնում է թիմին միավորներ վաստակել ռիսկային, բայց արդյունավետ մարտավարությամբ. «Դա շատ կարևոր է, քանի որ մեր խաղի մի մասն է։ Այն նպաստեց, որ տուն վերադառնանք 0:2 հաշվով և առանց բաց թողած գոլերի»։
Մամուլի ասուլիսի թեժ թեմաներից էր նաև «Ռեալ Մադրիդի» դուրս մնալը պայքարից։ Ֆլիկը, ով սովորաբար նշում է, որ չի դիտում ուշ ժամի հանդիպումները, հասկացրել է, որ տեսել և վերլուծել է երեկվա խաղը։ Հարցին՝ արդյոք զգուշացրե՞լ էր իր խաղացողներին «Ալբասետեում» տեղի ունեցածի մասին, Ֆլիկը բացատրել է, որ նման խաղերը հաղթում են ոչ թե անունով, այլ վերաբերմունքով.
««Ռասինգի» համար սա վերջին տարիների ամենակարևոր հանդիպումներից մեկն էր։ Մենք գալիս ենք Սուպերգավաթը հաղթած, բայց այս խաղերում հաղթանակի հասնում են լրջությամբ և մենթալիտետով»,- եզրափակել է մարզիչը։
