Հաջողության նոր ուղի. Տակուտո Օշիման՝ «Նոայի» հիմնական կազմում՝ 40 հազար եվրո աշխատավարձով։
27-ամյա ճապոնացի կիսապաշտպան Տակուտո Օշիման, որն այս ամռանը լքել էր «Ունիվերսիտատեա Կրայովան», միացել է Հայաստանի չեմպիոն «Նոային» 500 հազար եվրո տրանսֆերային արժեքով: Նա պատրաստվում է այսօր՝ հոկտեմբերի 23-ին, ժամը 23:00-ին, ՈւԵՖԱ Կոնֆերենցիաների լիգայի շրջանակներում խաղադաշտ դուրս գալ իր նախկին ակումբի՝ «Ունիվերսիտատեա Կրայովայի» դեմ:
«Ունիվերսիտատեա Կրայովայի» սեփականատեր Միհայ Ռոտարուն բացահայտել է Օշիմայի տրանսֆերի ֆինանսական մանրամասները «Նոայում»՝ նշելով, որ հայկական ակումբն ունի զգալի բյուջե:
««Նոան» թիմ է, որի պահեստային խաղացողները վաստակում են ամսական 40-45 հազար եվրո: Օշիման նրանց մոտ պահեստային է և ստանում է 40 հազար եվրո», — Ռոտարուի խոսքն է մեջբերում fanatik.ro-ն:
Ռոտարուն նաև նշել է, որ ռումինական կողմը հույս ուներ բոնուս ստանալ Օշիմայի պայմանագրից, եթե «Նոան» հաղթահարեր ՈւԵՖԱ Կոնֆերենցիաների լիգայի որակավորման փուլերը:
«Մեզ հետաքրքրում էր բոնուսային գումարը: Չգիտեինք, որ վիճակահանությամբ հենց «Նոայի» դեմ ենք խաղալու: Նրանք ուժեղ թիմ են, ոչ թե թույլ մրցակից», — ասել է նա:
Թեև Ռոտարուն Օշիմային անվանել է պահեստային, վերջինս վերջին հինգ խաղերից չորսում եղել է «Նոայի» մեկնարկային կազմում: Ընթացիկ մրցաշրջանում Օշիման մասնակցել է 12 հանդիպման (646 րոպե), խփել է մեկ գոլ և կատարել մեկ գոլային փոխանցում: Ըստ Transfermarkt-ի՝ նրա շուկայական արժեքը կազմում է 1 միլիոն եվրո:
