ՀՖՖ-ի պարզաբանումը Հայաստան–Պորտուգալիա խաղի տոմսերի շուրջ

Վերջին օրերին ֆուտբոլասերների շրջանում տարածված էր կարծիք, որ Հայաստանի ամենաթանկ արժույթը ոչ թե դոլարն է, այլ Պորտուգալիայի դեմ խաղի տոմսը: Իրոք, ստորություն է երեխաների համար այդքան սպասված հանդիպման տոմս գնելն ու այն «հոր գներով» վերավաճառելը:

Դե, այդպես է, չէ՞, եթե հայը հային չվնասի, առաջինը ո՞վ կվնասի: Ինչևէ, լավ է, որ գոնե հեռուստաալիքներով խաղը անվճար կհեռարձակվի: Գիտեք, ամենահետաքրքիրն այն կլինի, եթե Կրիշտիանու Ռոնալդուն պարզապես չգա այդ խաղին: Ցավոք, սա այն դեպքերից չէ, որ պորտուգալացին այդքան սրտաբաց գտնվի, քանի որ նա վճռական է տրամադրված 1000 գոլի շեմն անցնելու: Մարդ է, մեկ էլ տեսար՝ Հայաստանի դեմ խաղում մի քանի գոլ խփի։ Թողնենք պորտուգալացուն և մի պահ շեղվենք, քանի որ տոմսերի վաճառքի առիթով Հայաստանի ֆուտբոլի ֆեդերացիան հանդես է եկել հայտարարությամբ: Տեսնենք, թե ինչ է գրված հայտարարության մեջ:

🔔Հարգելի՛ երկրպագուներ,

Հայաստան-Պորտուգալիա հանդիպման տոմսերի վաճառքը մեծ արձագանք ստացավ:

Շատերը ՀՖՖ-ին մեղադրում են, որ չեն կարողացել տոմս գնել: «Հանրապետական» մարզադաշտը կարող է ընդունել առավելագույնը 14․000 երկրպագու: Տոմս ձեռք բերելու հայտ է ներկայացրել 470․000 մարդ։ 1 երկրպագուն կարող էր գնել 2 տոմսից ոչ ավելի, հետևաբար հնարավոր է եղել բավարարել մոտ 7000 հայտի պահանջ:

Բնականաբար, շուրջ 463․000 երկրպագու կարող է բողոքել, որ չի կարողացել տոմս գնել:

Տոմսերի պաշտոնական վաճառքից դեռ ամիսներ առաջ համացանցում եղել են վաճառքի վերաբերյալ ՈՉ պաշտոնական հայտարարություններ, հիմա էլ ոմանք աստղաբաշխական գներով տոմսեր են վաճառում:

Վերավաճառողների դեմ պայքարելու համար ՀՖֆ-ին խորհուրդ էին տալիս հանդիպման տոմսերը վաճառել 100․000-200․000 դրամ, բայց ՀՖՖ ռազմավարության հիմնական ուղղություններից է ֆուտբոլը որպես սոցիալական երևույթ ընկալելը։ Բնականաբար, տոմսերի նման թանկացում չէր կարող լինել:

Տեղեկացնենք, որ 14․000 նստատեղով ստադիոնի մոտ 7․000 տոմս վաճառվել է շատ մատչելի՝ 1000-3000 դրամ: Շուկայում այժմ այս տոմսերը վաճառում են տասնապատիկ թանկ:

ՀՖՖ-ի վաճառած բոլոր տոմսերի QR կոդերը ակտիվանալու են հանդիպման օրը՝ սեպտեմբերի 6-ին: Վերավաճառողները տոմսերը կարող են վաճառել մի քանի անձի, բայց ակտիվանալու է միայն մեկ QR կոդ: Այս դեպքում ևս կարող է լինել բողոքի մեծ ալիք, որի հետ ՀՖՖ-ն որևէ առնչություն չունի:

🔔Հարգելի՛ ֆուտբոլասերներ,

ՀՖՖ-ն հորդորում է շուկայից չգնել տոմս՝ հետագա բարդություններից խուսափելու համար: ՀՖՖ-ն պատասխանատու չէ այլ անձանց վաճառած տոմսի համար: Վերավաճառողից տոմս չգնելով՝ կօգնենք, որպեսզի հետագայում հայկական ֆուտբոլից իսպառ վերանա այս բացասական երևույթը:

Այսպիսով, «Հանրապետական» մարզադաշտը կարող է ընդունել միայն 14․000 երկրպագու, մինչդեռ տոմս ձեռք բերելու հայտ է ներկայացրել շուրջ 470․000 մարդ։ Այսպիսով՝ ավելի քան 463․000 երկրպագու չի կարողացել տոմս ստանալ։

ՀՖՖ-ն նշում է, որ տոմսերը վաճառվել են մատչելի գնով՝ 1000–3000 դրամ, սակայն շուկայում դրանք առաջարկվում են տասնապատիկ թանկ։ Վերավաճառողները կարող են վաճառել նույն տոմսը մի քանի անձի, բայց ակտիվանալու է միայն մեկ QR կոդ, ինչը կբերի խնդիրների։

Ֆեդերացիան հորդորում է չգնել տոմսեր շուկայից, քանի որ պատասխանատվություն է կրում միայն պաշտոնական վաճառքի համար։

Թե ինչպես վաճառվեցին այդ տոմսերը ֆանտաստիկ արագությամբ՝ ահավոր ծանր աշխատող կայքում, միայն Աստված գիտի: Իսկ թե ովքեր դարձան այն երջանիկները, որոնք գնեցին դրանք, դա նույնպես գիտեն միայն «վերևները»։