Մադրիդի «Ատլետիկոն» լրջորեն հետաքրքրված է «Բարսելոնայի» իսպանացի կիսապաշտպան Մարկ Կասադոյի ծառայություններով։ Այս մասին հայտնում է Sport.es-ը։
Աղբյուրի տեղեկություններով՝ մադրիդյան ակումբի գլխավոր մարզիչ Դիեգո Սիմեոնեն հիացած է 21-ամյա խաղացողով և կարծում է, որ նա հիանալի կհամապատասխանի իր մարտավարական ծրագրերին։ Ավելի վաղ շրջանառվում էին լուրեր, որ «կապտանռնագույնները» պատրաստ են քննարկել Կասադոյի տեղափոխության վերաբերյալ առաջարկներ՝ ֆինանսական դժվարությունների ֆոնին։
Միևնույն ժամանակ ընդգծվում է, որ կիսապաշտպանը չի ցանկանում լքել կատալոնական ակումբը և մտադիր է պայքարել հիմնական կազմում տեղ գրավելու համար։
Անցած մրցաշրջանում Կասադոն «Բարսելոնայի» կազմում մասնակցել է 36 հանդիպման՝ խփելով 1 գոլ և կատարելով 6 գոլային փոխանցում։ Նրա գործող պայմանագիրը նախատեսված է մինչև 2028 թվականի ամառը։ Transfermarkt-ը 21-ամյա իսպանացու տրանսֆերային արժեքը գնահատում է 30 միլիոն եվրո։
