«Ոսկե գնդակի» 2025 թվականի մրցանակաբաշխության մոտենալուն զուգահեռ խոսակցություններն ու վեճերը նոր թափ են հավաքում։ Այս տարի մրցանակի հիմնական հավակնորդներն են Լամին Յամալը, Կիլիան Մբապեն, Ուսման Դեմբելեն, իսկ նախկինում մրցանակը կորցրած մի շարք ֆուտբոլիստներ կրկին հայտնվել են քննարկումների կենտրոնում։
Ֆրանկ Ռիբերին, ով 2013-ին չստացավ «Ոսկե գնդակը»՝ չնայած այդ տարվա իր կարիերայի լավագույն ելույթներին, ծաղրել է Կրիշտիանու Ռոնալդուի վերջին հայտարարությունը։ Ռոնալդուն ասել էր. «Իմ կարծիքով, նրանք, ովքեր հաղթում են Չեմպիոնների լիգան, պետք է ստանան «Ոսկե գնդակը»։
Արձագանքելով այս խոսքերին՝ Ռիբերին գրառում է կատարել.
«Ուրեմն Ոսկե գնդակ նվաճելու համար ՊԱՐՏԱԴԻՐ է հաղթել ՉԼ-ն՞», կցելով մի շարք ծաղրական ծիծաղող էմոջիներ։
So you NEED to win the Champions League to win the Ballon d’Or? 🤣🤣🤣
— Franck Ribéry (@FranckRibery) June 7, 2025
Հիշեցնենք, որ 2013-ին Ռիբերին «Բավարիայի» կազմում նվաճել էր Բունդեսլիգայի, Գերմանիայի գավաթի և Չեմպիոնների լիգայի տիտղոսները, ցուցաբերել էր բարձր անհատական ցուցանիշներ և ստացել ՈւԵՖԱ-ի տարվա լավագույն խաղացողի մրցանակը, սակայն «Ոսկե գնդակը» չէր նվաճել։ Մրցանակը տրվել էր Ռոնալդուին, ով այդ մրցաշրջանում մնացել էր առանց տիտղոսի։
Մինչ Ռոնալդուն պնդում է, որ անհատական մրցանակներն այժմ կորցրել են իրենց արժեքը, Ռիբերին շարունակում է ընդգծել 2013 թվականի արդարության բացակայությունը։
Այս տարվա գլխավոր հավակնորդներն են՝
- Լամին Յամալ
- Ուսման Դեմբելե
- Վիտինյա
- Մոհամեդ Սալահ
- Ռաֆինյա
Ռոնալդուն խորհուրդ է տվել Յամալին չծանրաբեռնել՝ նշելով. «Թող նա զարգանա առանց ճնշման։ Նրա տաղանդը անսպառ է»։
«Ոսկե գնդակը», ինչպես ցույց է տվել վերջին տասնամյակի փորձը, հաճախ տրվում է Չեմպիոնների լիգայի հաղթողներին։ Սա ևս մեկ պատճառ է, որ Ռիբերին այսօր հիշեցնում է 2013 թվականի իր ձեռքբերումներն ու հիասթափությունը։
