Հունահռոմեական ոճի ըմբշամարտի Հայաստանի հավաքականը՝ Արմեն Բաբալարյանի գլխավորությամբ, Բելգրադում ավարտված աշխարհի առաջնության թիմային հաշվարկում զբաղեցրել է 5-րդ հորիզոնականը:
Հայաստանի թիմի կազմում ԱԱ-ի արծաթե մեդալը նվաճել էր ՕԽ չեմպիոն, Եվրոպայի 6-ակի և աշխարհի քառակի չեմպիոն Արթուր Ալեքսանյանը:
Ըմբշամարտի աշխարհի չեմպիոն, Եվրոպայի կրկնակի չեմպիոն Մալխաս Ամոյանը Բելգրադում ավարտված աշխարհի վարկանիշային ԱԱ-ում նաև բրոնզե մեդալ է նվաճել՝ 77 կգ քաշայինների վճռորոշ գոտեմարտում 9։7 հաշվով հաղթանակ տանելով Ղազախստանի ներկայացուցիչ Դեմեու Ժադրաևի նկատմամբ։
Հայաստանի թիմը նաև Փարիզի 2024 թվականի Օլիմպիական խաղերի 3 ուղեգիր է նվաճել: Բացի Ալեքսանյանից և Ամոյանից, Փարիզում իր մասնակցությունն ապահովել է նաև 67 կգ քաշային Սլավիկ Գալստյանը:
Բրոնզե մեդալներ նվաճելուն մոտ են եղել նաև Հրաչյա Պողոսյանն ու Գևորգ Ղարիբյանը: 63 կգ քաշային կարգում Հրաչյա Պողոսյանը մեդալի համար գոտեմարտում 0-4 հաշվով զիջել է սերբ Գիորգի Տիբիլովին, իսկ Գևորգ Ղարիբյանը (60 կգ) ուժերն է չափել Չինաստանի ներկայացուցիչ Չաո Լիգունի հետ և 3:5 հաշվով ցավալի պարտություն կրել: Նրանք զբաղեցրել են 5-րդ հորիզոնականը:
Ավելի վաղ Հայաստանի ազատ ոճի ըմբշամարտի հավաքականը 3 բրոնզե մեդալ և 2 օլիմպիական ուղեգիր էր նվաճել աշխարհի առաջնությունում: Բրոնզե մեդալակիրներ էին դարձել 57 կգ քաշային Արսեն Հարությունյանը, 65 կգ քաշային Վազգեն Թևանյանը և 70 կգ քաշային Արման Անդրեասյանը: Հարությունյանն ու Թևանյանը նաև Փարիզ-2024-ի ուղեգրեր են ապահովել:
