Ազատ ոճային ըմբիշ Վազգեն Թևանյանը, որը Զագրեբում անցկացված Եվրոպայի առաջնությունում նվաճել է չեմպիոնի կոչումը, լրագրողների հետ հանդիպման ժամանակ կիսվել է տպավորություններով.
«Այս մեդալը շատ սպասված էր ինձ համար, քանի որ մի քանի տարի չկարողացա մասնակցել Եվրոպայի առաջնություններին: Անցկացրի 4 գոտեմարտ ու գոհ եմ արդյունքներիցս: Շատ ուրախ եմ մեդալի համար: Չնայած կա հաղթանակ՝ կան նաև սխալներ, որոնց շուրջ հետագայում պետք է աշխատենք»,- ասել է Թևանյանը:
«Բոլոր գոտեմարտերին էլ տրամադրվում եմ, որ կհաղթեմ: Եզրափակչում վստահություն ունեի, որ հաղթելու եմ: Առաջիկայում նախապատրաստվելու ենք աշխարհի առաջնությանն ու փորձենք անեմ ամեն ինչ՝ Օլիմպիական խաղերի ուղեգիր նվաճելու համար»,- ընդգծել է Վազգեն Թևանյանը և նշել, որ հաղթանակը նվիրում է իրեն աջակցողներին.
«Մրցումներից մեկ օր առաջ՝ ապրիլի 16-ին, հայրիկիս ծնունդն է: Երբ խոսում էինք, ասաց, որ իր համար ամենամեծ նվերն այն կլինի, որ ես վերջապես հաղթեմ Եվրոպայի առաջնությունում: Ծնողներիս համար էլ այս մեդալը շատ սպասված էր: Այս հաղթանակս նվիրում եմ ինձ ոգևորողներին ու աջակցողներին»,- ասել է Թևանյանը:
Հիշեցնենք՝ Վազգեն Թևանյանը կարիերայում առաջին անգամ է ոսկե մեդալ նվաճում մեծահասակների Եվրոպայի առաջնությունում: Մինչ այս նա ճանաչվել էր Եվրոպայի Մ17, Մ20 և Մ23 տարեկանների առաջնությունների հաղթող: