Հայաստանի ազգային հավաքականի գլխավոր մարզիչ Խոակին Կապառոսը Նորվեգիայի դեմ կայանալիք ընկերական խաղից առաջ Օսլոյում պատասխանել է լրագրողների հարցերին։
Մրցակցի մասին
-Մենք վերլուծել ենք մրցակցի խաղը և բնականաբար մեր վերջին խաղը: Սպասում ենք դժվարին խաղ, քանի որ նորվեգիայի թիմում են հանդես գալիս երիտասարդ տաղանդավոր ֆուտբոլիստներ: Կարծում եմ, որ շուտով Նորվեգիայի հավաքականն աշխարհում մեծ դերակատարություն կունենա:
Նորվեգիայի հավաքականի հավանական մեկնարկային կազմի մասին
-Իհարկե շատ կարևոր է իմանալ Նորվեգիայի հավաքականի կազմը, սակայն կարծում եմ, որ այս հանդիպումները հետապնդում են այն նպատակը, որ կարողանանք մրցակցել, որովհետև մեզ բաժին են հասել դժվարին մրցակիցներ Ազգերի լիգայի մրցաշարում: Այդ պատճառով ընտրվել են այս հավաքականները:
Վաղվա խաղում մեր թիմի մեկնարկային կազմի մասին
-Իհարկե, մենք հստակ պատկերացնում ենք մեկնարկային կազմը, բայց առջևում 24 ժամ կա ու կարող են լինել փոփոխություններ: Մենք ցանկանում ենք բոլորին տեսնել այսպիսի դժվարին խաղերում, քանի որ հունիսին ունենք 4 հանդիպում և բոլոր տղաները պետք է փորձ ունենան, քանի որ ցանկանում ենք լավ մրցակցել:
Բերեզովսկիի և դարպասապահների մասին
-Իհարկե, համոզված եմ, որ Բերեզովսկին կիսվել է նորվեգացիների դեմ խաղի իր փորձով: Բերեզովսկին է մարզում դարպասապահներին և վայելում է նրանց վստահությունը: Այն ամենը, ինչ ասում է նա մեր դարպասապահներրին, նրանք աշխատում են այդ ուղղությամբ:
Երիտասարդ ֆուտբոլիստների մասին
-Մենք ձգտում ենք նրան, որ հնարավորինս շատ ֆուտբոլիստներ ունենանք մեր տրամադրության տակ, որպեսզի մրցակցություն ունենանք: Ես արդեն ասել եմ, որ ֆուտբոլիստի տարիքը կապ չունի: Անկախ տարիքից, պնդում եմ, որ մենք պետք է ունենանք լայն ֆուտբոլիստների ցուցակ, եթե ցանկանում ենք աճել որպես հավաքական: Այս երիտասարդների հետ լավ աշխատանք է տարվում և հուսով ենք, որ այս տղաները կօգտվեն իրենց շանսից և կարդարացնեն իրենց: