Հայաստանի երիտասարդական հավաքականին այսօր լուրջ փորձություն է սպասվում. Եվրո-2021-ի ընտրական փուլի 4-րդ տուրում մեր Մ21 հավաքականի ֆուտբոլիստներն Ավանի ակադեմիայի մարզադաշտում կընդունեն հզոր Իտալիային ու կանեն ամեն ինչ՝ օրեր առաջ Գյումրիում գրանցած հաջողությունը կրկնելու համար:
Գյումրիում, իհարկե, խաղում էինք խմբի հետնապահի՝ Լյուքսեմբուրգի հետ, որին միայն 2-0 հաշվով կարողացանք հաղթել՝ Ռուդիկ Մկրտչյանի ու Արթուր Դանիելյանի գեղեցիկ գոլերի շնորհիվ, խաղավարտին էլ դարպասապահ Սևակ Ասլանյանի փայլուն սեյվի շնորհիվ խուսափեցինք ամբողջ երկրորդ կեսը 10 հոգով անցկացրած մրցակցից գոլ ընդունելուց:
Այդուհանդերձ, առաջին հաղթանակն ու առաջին միավորները Անտոնիո Ֆլորեսի թիմին վստահություն ու բարձր տրամադրություն կհաղորդեն իտալացիների հետ խաղից առաջ: Սակայն իտալացիներն էլ օրերս մեր խմբի առաջատար Իռլանդիայի Մ21 հավաքականի հետ Դուբլինում գոլազուրկ ոչ-ոքիից հետո, երևանյան խաղին, միանշանակ, միտված կլինեն գոլ խփելու ու 3 միավոր վաստակելու:
Իտալիայի Մ21 հավաքականը, որը Եվրո-2021-ի այս ընտրական փուլում դեռ 2 խաղ է անցկացրել (առաջին խաղում 5:0 հաշվով հաղթել է Լյուքսեմբուրգի Մ21 հավաքականին), որոշ կադրային խնդիրներով է մոտենում առաջիկա հանդիպմանը:
Պաոլո Նիկոլատոն այսօրվա խաղում չի կարողանա հույս դնել «Էվերթոնի» հարձակվող Մոյզե Քինի վրա, որն իռլանդացիների հետ խաղում ստացած կարմիր քարտի պատճառով որակազրկվել է:
Այդուհանդերձ, իտալացիների գլխավոր մարզիչը հարձակման գծում այլ տարբերակներ ևս ունի ի դեմս «Վուլվերհեմփթոնի» հարձակվող Պատրիկ Կուտրոնեի, «Ջենոայի» հարձակվող Անդրեա Պինամոնտիի, «Ասկոլլիի» հարձակվող Ջանլուկա Սկամակայի և «Ֆիորենտինայի» հարձակվող Ռիկարդո Սոտիլի, ովքեր կարող են լուրջ խնդիրներ ստեղծել մեր պաշտպանների համար:
Իտալական «Բրեշիայի» կիսապաշտպան Սանդրո Տոնալին էլ վերջին պահին հրավեր է ստացել երկրի Ազգային թիմից, իսկ պաշտպան Ռիկարդո Մարկիզան վնասվածք է ստացել:
«Ամենայն հավանականությամբ, այլ փոփոխություններ ևս կլինեն: Մենք պետք է գնահատենք իրավիճակն, իսկ կազմի վերաբերյալ վերջնական որոշում կկայանացնենք վերջին պահին»,- ասել է Նիկոլատոն:
Մարզիչը, սակայն, նշել է, որ խաղային 4-3-3 մարտավարությունը կմնա անփոփոխ.
«Մենք մեր ճամփորդության սկզբում ենք ու պետք է աշխատենք այս ուղղությամբ: Լավ աշխատանք կատարելու համար ժամանակ է անհրաժեշտ: Պետք է հանգստություն պահպանենք ու հաշվի առնենք, որ յուրաքանչյուր խաղ իր առանձին պատմությունն ունի: Ավարտում ենք 10-օրյա մեր դժվարին հավաքը՝ լի ճամփորդությամբ ու եղանակային փոփոխություններով, ինչը որոշակի խնդիրներ առաջացրել է: Մենք հույս ունենք վաղը լավ խաղալ, ցանկանում ենք անել դա»,- մարզչի խոսքերն է փոխանցում Իտալիայի ֆուտբոլի ֆեդերացիայի պաշտոնական կայքը:
Մարզիչն ընդգծել է նաև, որ Հայաստանի Մ21 հավաքականի հետ խաղում իրենք դժվարություններ են ակնկալում.
«Նրանք էներգիայով լի են, բավականին բարդ մրցակից, ու գիտենք, որ այսօր դժվարություններ ենք ունենալու: Պետք է պատրաստ լինենք, սպասենք խնդիրների ու պատրաստ լինենք լուծումներ գտնելու»,- ասել է Նիկոլատոն:
Երեկ առավոտյան Իտալիայի Մ21 հավաքականի ֆուտբոլիստները մարզում են անցկացրել Ավանի ակադեմիայի մարզադաշտում: Մեր մրցակցի ամբողջական հայտացուցակն այս տեսքն ունի՝
Դարպասապահներ. Մարկո Կարնեսեկի («Տրապանի»), Մաթիա Դել Ֆավերո («Պիաչենցա»), Ալեսանդրո Պլիցարի («Լիվորնո»),
Պաշտպաններ. Կլաուդ Աջաբոնգ («Վերոնա»), Ալեսանդրո Բաստոնի («Ինտեր»), Դավիդե Բետելա («Պեսկարա»), Էնրիկո Դելպրատո («Լիվորնո»), Մաթեո Գաբիա («Միլան»), Լուկա Պելեգրինի («Կալյարի»), Լուկա Ռանիերի («Ֆիորենտինա»), Մարկո Սալա («Վիրտուս Էնտելա»),
Կիսապաշտպաններ. Մարկո Կարարո («Պերուջա»), Դավիդե Ֆրատեսի («Էմպոլի»), Մանուել Լոկատելի («Սասուոլո»), Ջուլիո Մաջորե («Սպեցիա»), Ֆաբիո Մայիստրո («Սալերնիտանա»), Նիկոլո Զանելատո («Կրոտոնե»),
Հարձակվողներ. Պատրիկ Կուտրոնե («Վուլվերհեմփթոն»), Անդրեա Պինամոնտի («Ջենոա»), Ջանլուկա Սկամակա («Ասկոլի»), Ռիկարդո Սոտիլ («Ֆիորենտինա»):
Լյուքսեմբուրգի Մ21 հավաքականի նկատմամբ տոնած հաղթանակից ու առաջին միավորները վաստակելուց հետո բարձր տրամադրությամբ նախախաղային մարզում են անցկացրել նաև Հայաստանի Մ21 հավաքականի ֆուտբոլիստները:
Վստահ ենք՝ Վահան Բիչախչյանն ու ընկերներն ամեն ինչ կանեն արժանապատիվ խաղ ցուցադրելու և հաջողության հասնելու համար՝ կարևորագույն քայլ կատարելով հայկական ֆուտբոլային երազանքի իրականացման ճանապարհին:
A խմբի մրցաշարային աղյուսակում Հայաստանի Մ21 հավաքականն այս պահին 5-րդն է՝ 3 խաղից հետո վաստակած 3 միավորով: Իտալացիները, որոնք դեռ 2 հանդիպում են անցկացրել, 4 միավոր ունեն իրենց ակտիվում ու գտնվում են 3-րդ տեղում:
Իտալիայի Մ21 հավաքականի հետ մեր ընտրանին կմրցի Ավանի ակադեմիայի մարզադաշտում: Խաղը կմեկնարկի ժամը 20:30-ին, իսկ մուտքն արժե 1000 դրամ: Տոմսերը կարելի է ձեռք բերել Ավանի ակադեմիայի տոմսարկղից: Հանդիպումն ուղիղ հեռարձակմամբ կցուցադրվի Armenia TV-ի եթերում:
