Բռնցքամարտի Հայաստանի երիտասարդական հավաքականի գլխավոր մարզիչ Վազգեն Բադալյանն ամփոփել է Բուդվայում կայացած Եվրոպայի երիտասարդական առաջնության արդյունքները. բռնցքամարտիկները Հայաստան են վերադարձել 2 ոսկե, 2 արծաթե և 1 բրոնզե մեդալով:
«Նախ կցանկանամ հաջողություն մաղթել մեր ազգային հավաքականին Սերբիայում մեկնարկած աշխարհի առաջնությունում: Մեր հավաքականին մաղթում ենք ավելի բարձր ցուցանիշներ, քան ունեցանք մենք:
Եվրոպայի առաջնությունում մեր պատվիրակությունը գլխավորում էր ֆեդերացիայի նախագահ Հովհաննես Հովսեփյանը,որն ամեն օր ու ամեն հարցով մեր կողքին էր:
54 կգ քաշային կարգում Ռուբենյան Սուրենը մեդալ կորցրեց միայն այն պատճառով, որ Վրաստանից ներկայացված մրցավարն ազգությամբ թուրք էր,ես ադրբեջանցիներին էլ եմ թուրք ասում, իր ձայնը տվեց մրցակցին ու մեդալը կորցրինք:Նվազագույնը բրոնզ կապահովեինք: Հովսեփյանը նման խնդիների կազմակերպմամբ էր զբաղվում»,-ասել է Վազգեն Բադալյանն ու անդրադարձել նաև մյուս բռնցքամարտիկների ելույթներին.
«Քառորդ եզրափակչի 8 մասնակից ունեցանք, որոնք կարող էին մեդալներ ապահովել: Արևիկ Դոխոլյանն ու Հարությունյան Սոնան պարտվեցին:
Ինչ վերաբերում է մեր չեմպիոններին, Հենրի Սահակյանը նախկինում մեծ հաջողություններ չի ունեցել, բայց ես զարմացած եմ իր բարձր կարգապահությամբ և մարդկային տեսակով: Բնավորությունը շատ կարևոր է թիմային աշխատանքում: Եզրափակչում շատ գեղեցիկ մենամարտ անցկացրեց,դասական բռնցքամարտ ցույց տվեց. երիտասարդները մենամարտերի ժամանակ ուզում են իմպրովիզացիաների դիմել, բայց ես միշտ արգելում եմ,քանի որ փորձարկումները պետք է մարզումների ժամանակ անեն: Հենրիկն առաջին անգամ դարձավ Եվրոպայի չեմպիոն, առհասարակ սա իր կարիերայի առաջին տիտղոսն էր, շատ ուրախացրեց մեզ: Պետք է ասեմ նաև, որ Հենրիկը ցանկանում է ոչ թե ֆիզկուլտում սովորել , այլ բժշկականում:Շատ կիրթ տղա է»,- ասել է Վազգեն Բադալյանը:
Երիտասարդական հավաքականի գլխավոր մարզիչը նշել է, որ տղաներն ավելին կարող էին անել, թեպետ այս արդյունքներն էլ շատ գոհացնող են.
«Մենք ավելին կարող էինք:Մեր ամենամեծ հույսերից մեկը Հովհաննես Փափազյանից, նա աշխարհի արծաթե մեդալակիր էր, Փափազյանից բոլորը վախենում էին, բայց չստացվեց լավ արդյունք գրանցել,չգիտեմ ինչ էր կատարվում նրա հետ: Դժգոհ ենք: Մեր գրպանում էր մեդալը, բայց կորցրեցինք:
Ամեն դեպքում շատ գոհ եմ արդյունքներից: Տղաները շատ լավ մասնակցեցին»:
Խոսելով սերնդափոխության մասին՝ Բադալյանն ընդգծել է, որ ապագայի հետ մեծ հույսեր են կապվում և իրենք ճիշտ ճանապարհի վրա են.
«Այսօրվա իրենց գրանցած արդյունքները ցույց են տալիս, որ լավ ապագա ունենք, սերնդափոխությունն էլ ճիշտ է կատարվում: Բռնցքամարտը շատ ինտենսիվ է դարձել: Այս հավաքների ժամանակ շատ ուշադրություն եմ դարձել ֆիզ.պատրաստվածությանը, ու այնքան հաճույքով էին անում: Հարցնում էի՝ կարո՞ղ է ամաչում եք ասել,որ շատ եմ ծանրաբեռնում: Ասում էին՝ ոչ,ոչ մի խնդիր չկա:
Այս հավաքականից դեռ կան երիտասարդներ, ովքեր 2004 թվականի ծնունդ են ու դեռ կշարունակենք միասին աշխատել, 4-5 երիտասարդ: Իսկ այստեղ ներկա երիտասարդներն արդեն տեղափոխվում են մեծահասակների մակարդակ: Դեռ պետք է քննարկենք, թե հանրապետության առաջնությունը երբ ենք անցկացնելու: Լավ կլինի, որ նաև միջազգային մրցաշարերի մասնակցենք»:
Մարզիչը նաև ընդգծել է, որ Փարիզ-2024-ին մասնակցելու հնարավորությունն այս երիտասարդների համար իրատեսական է.
«Ես հավատում եմ, որ կհասցնեն մինչև 2024 թվականի Օլիմպիական խաղերը: Պետք է ասեմ, որ ոչ մի անգամ նրանց նկատողություն չեմ արել: Շատ գոհ եմ նրանցից»:
