Գյումրու «Քաղաքային» մարզադաշտում կայացած Հայաստան – Լյուքսեմբուրգ Մ-21 տարեկանների Եվրո-2021-ի ընտրական փուլի խաղը սկզբունքային ու կարևոր էր Վահան Բիչախչյանի համար: Երկարատև դադարից հետո ֆուտբոլիստը կրկին վերադարձել էր հայրենի քաղաք: Խաղից հետո տպավորությունների մասին Բիչախչյանը պատմեց լրագրողներին:
– Հիանալի տպավորություններ ունենք, քանի որ սա առաջին հաղթանակն էր: Շնորհավորում եմ բոլորիս, հատկապես Գյումրիին, նրանց, ովքեր ժամանել էին Գյումրի: Շատ մեծ աջակցություն էր, շատ ունեինք իրենց կարիքը:
Հույս ունեմ, որ արդարացրեցինք երկրպագուների սպասելիքները:
– Այսօր ձեր լավագույն խաղը չանցկացրիք, նաև դու՝ անձնապես: Հնարավո՞ր է, որ մեծ ցանկությունից էր:
– Չեմ կարող հստակ ասել, թե ինչու չստացվեց: Կոնկրետ ես շատ երկար էի սպասել այս խաղին ու ուզում էի ամեն ինչ անել, օգնել թիմին: Ինչ-որ չափով ստացվեց, ինչ-որ չափով չստացվեց: Հուսով եմ՝ մյուս խաղում ամեն ինչ ավելի լավ կլինի:
– Փոխարինվելուց առաջ մկանդ էիր բռնել: Վնասվածք եղա՞վ:
– Ազդրի հետևի վերին մկանի ցավեր կային, բայց լուրջ բան չկա:
– Նախորդ շրջափուլին ևս մասնակցում էիր: Ո՞րն ավելի մեծ հավակնություններ ուներ: Այս թիմն ինչի՞ կարող է հասնել:
– Թե´ այն հավաքականում, թե այստեղ շատ լավ տղաներ են հավաքված: Այն թիմի մոտ ինչ-որ բաներ չստացվեցին, բայց լավ խաղեր ունեցել ենք: Մենք միշտ խաղում ենք ազգի պատվի համար: Կարևոր չէ, ում դեմ ենք խաղում, այլ կարևոր է, որ այդ ընթացքում զարգացնենք մեզ ու առավելագույնը ցույց տանք մեր ազգի համար:
