«Արարատի» գլխավոր մարզիչ Վարդան Բիչախչյանը Կոնֆերենցիաների գավաթի որակավորման առաջին փուլի՝ «Ֆեհերվարի» դեմ արտագնա խաղից առաջ պատասխանել է լրագրողների հարցերին։ Նախախաղային մամուլի ասուլիսը ներկայացրել է երևանյան ակումբի մամուլի ծառայությունը։
-Ի՞նչ վիճակում է մոտեցել թիմը խաղին։ Կա՞ն ֆուտբոլիստներ, որոնք պատրաստ չեն խաղին։
-Թիմը նորմալ է մոտեցել առաջիկա խաղին, բնականաբար, կան խաղացողներ, որոնք առաջնության վերջնամասում ստացան վնասվածքներ և ժամանակ էր պետք վերականգնվելու համար։ Այդ խաղացողներն արդեն պատրաստ են և թիմի հետ մեկ շաբաթ մարզումների են մասնակցել։ Կարծում եմ` կարողացել ենք նորմալ մոտենալ առաջիկա խաղին։
-Պարո՛ն Բիչախչյան, «Արարատը» Հունգարիա մեկնելուց առաջ մի շարք տրանսֆերներ իրականացրեց։ Արդյոք խաղային բոլոր գոտիներում բացերը լրացվա՞ծ են և նորեկներն արդեն ադապտացվե՞լ են թիմին։
-Փորձեցինք շատ կարճ ժամանակում հնարավորինս լրացնել հեռացած ֆուտբոլիստների բացը։ Իմ կարծիքով՝ ադապտացիայի խնդիր պետք է չլինի, իսկ թե կկարողանան լրացնել այդ բացը` ցույց կտա ժամանակը։
-Պարո´ն Բիչախչյան, եվրագավաթներից առաջ թիմից հեռացած ու թիմ եկած ֆուտբոլիստները որքանո՞վ են իրար համարժեք, ի՞նչ տեսք ունի «Արարատն» այդ փոփոխություններից հետո և որքանո՞վ է պատրաստ վաղվա խաղին:
-Նորմալ է, որ մրցաշրջանից հետո թիմից որոշ խաղացողներ են հեռանում և նրանց փոխարեն նոր համալրումներ են լինում։ Կարծում եմ՝ այս հարցի պատասխանն արդեն տվեցի` ամեն ինչ ցույց կտա ժամանակը։
-Ըստ Ձեր ուսումնասիրությունների` ինչպիսի՞ մրցակցի է վաղը հանդիպելու «Արարատը» : Ինչի՞ հաշվին կարող է «Արարատը» հաղթհարել հունգարական ուժեղ թիմի արգելքը։
-Բավականին լավ թիմ է «Ֆեհերվարը» ։ Ուսումնասիրել ենք մրցակցին, գիտենք ուժեղ և թույլ կողմերը։ Ամենայն լրջությամբ ենք մոտեցել խաղին և, բնականաբար, մենք էլ ունենք մեր նպատակները։ Փորձելու ենք փակել մրցակցի ուժեղ կողմերը և օգտագործել թույլ կողմերը։ Ամեն ինչ որոշվելու է դաշտում։
