Եվրո-2020-ի խմբային փուլի երկրորդ տուրում Գերմանիայի հավաքականը Մյունխենի «Ալյանց-Արենայում» հյուրի կարգավիճակով մրցեց Պորտուգալիայի ընտրանու հետ ու 4-2 հաշվով հաղթանակ տարավ դրամատիկ խաղում:
Առաջին կեսում գոլեր հեղինակեցին միայն պորտուգալացիները, թեև երկուսը՝ սեփական դարպասին: Հանդիպման հաշիվը 15-րդ րոպեին բացեց պորտուգալացիների առաջատար Կրիշտիանու Ռոնալդուն: 10 րոպե անց Ռուբեն Դիաշն անզգուշորեն գրավեց սեփական դարպասն ու հավասարեցրեց հաշիվը, իսկ 39-րդ րոպեին Պորտուգալիայի հավաքականի ֆուտբոլիստ Ռաֆայել Գերեյրուն «առաջ մղեց» գերմանացիներին՝ ևս դառնալով ինքնագոլի հեղինակ: Այսպիսով, Գերմանիայի հավաքականն ընդմիջման գնաց 2-1 հաշվի պայմաններում:
Երկրորդ կեսում Գերմանիայի հավաքականի ֆուտբոլիստներն ունեցած խաղային առավելությունը վերածեցին գոլերի՝ արդեն իրենց անվան դիմաց: 51-րդ րոպեին Կայ Հավերցը հաշիվը դարձրեց 3-1, իսկ 10 րոպե անց Ռոբին Գոնսեսը պորտուգալացիների դարպասապահ Ռուի Պատրիսիուին ստիպեց այս խաղում 4-րդ անգամ գնդակը հանել սեփական դարպասից:
Պորտուգալիայի հավաքականի ֆուտբոլիստները մեկ գնդակ կարողացան հետ բերել 67-րդ րոպեին՝ Դիոգու Ժոտայի ջանքերով, ովդիպուկ գտնվեց Ռոնալդուի փոխանցումից հետո: Ի դեպ, Ռոնալդուի գոլի դրվագում էլ գոլային փոխանցումն իր ակտիվում գրանցեց հենց Ժոտան:
Այսպիսով, Գերմանիայի հավաքականն իր առաջին երեք միավորը վաստակեց Եվրո-2020-ի խմբային փուլում ու միանգամից բարձրացավ F խմբի մրցաշարային աղյուսակի երկրորդ հորիզոնականը: Պորտուգալիայի հավաքականը, որի ակտիվում ևս 3 միավոր կա, լրացուցիչ ցուցանիշներով երրորդ տեղում է: F խմբի աղյուսակը գլխավորում է Ֆրանսիան, որի ակտիվում 4 միավոր կա: Հունգարիայի հավաքականը 1 միավորով եզրափակում է այն: