2020/21 մրցաշրջանում Ֆուտբոլի Հայաստանի չեմպիոն դարձավ Երևանի «Ալաշկերտը»: Մրցաշրջանի ընթացքում թիմում 3 անգամ մարզչական փոփոխություն կատարվեց: Մրցաշրջանի ավարտից 3 տուր առաջ Խաշմանյանին փոխարինեց Գրիգորյանը. թիմը 3 խաղում տոնեց նույքան հաղթանակ ու դարձավ Հայաստանի չեմպիոն:
Armsport-ը զրուցել է ակումբի սեփականատեր Բագրատ Նավոյանի հետ ու ստացել շատ հետաքրքիր հարցերի պատասխաններ:
-Պարոն Նավոյան, ամեն օր չեք տեսնի, որ մեկ թիմում մեկ մրցաշրջանի ընթացքում մարզչական 3 փոփոխություն լինի, և այդ թիմը դառնա Հայաստանի չեմպիոն: Սկսենք սկզբից. աշնանային հատվածից հետո Եղիշե Մելիքյանի «Ալաշկերտը» առաջատար էր, բայց նա հեռացավ: Տարբեր կարծիքներ կան, թե ինչու. Ձեր հստակ պատասխանն է հետաքրքիր:
-Որոշ լրատվամիջոցներ գրեցին, որ հեռացրին Եղիշե Մելիքյանին, հետո՝ Աբրահամ Խաշմանյանին: Հերթը՝ Ալեքսանդր Գրիգորյանինն է: Բոլորին թող պարզ լինի. Մելիքյանին «Ալաշկերտը» չի հեռացրել: Մեր սկզբունքն այնպիսին է, որ եթե խաղացողը կամ մարզիչը լավ առաջարկ է ստանում, մենք չենք խոչընդոտում: Եթե լավ առաջարկ է լինում, ինչու՞ խանգարես: Մելիքյանը եկավ, ասաց, որ ավելի լավ առաջարկ ունի «Փյունիկից»: Ասեմ ավելին, ես հարց տվեցի. «Թողնում ես չեմպիոն թիմն ու հեռանու՞մ («Ալաշկերտն այդ ժամանակ առաջատար էր)»: Մելիքյանն ասաց, որ երկարատև պլաններ կան «Փյունիկում»: Ես ընդառաջեցի, խզեցինք պայմանագիրն ու առանց իրարից նեղանալու «բաժանվեցինք»: Մենք այսօր էլ պահպանում ենք մեր շատ լավ հարաբերությունները: Մելիքյանը լավ մասնագետ է, ինչում համոզվեցի կարճ աշխատանքի ընթացքում: Այն, որ «Ալաշկերտը» չեմպիոն է, այդ հարցում իր ավանդն ունի նաև Մելիքյանը:
-Ի՞նչ տեղի ունեցավ Խաշմանյանի պարագայում: Հերթական անգամ նա եկավ ու գնաց: Դուք մեկ անգամ չէ, որ աշխատել եք նրա հետ. ո՞րն էր խնդիրը՝ իրականում:
-Ինչ վերաբերում է Աբրահամ Խաշմանյանին, Մելիքյանը, որ գնաց «Փյունիկ», ժամանակ չունեինք՝ արտասահմանից մասնագետ հրավիրելու: Խոսեցի Աբրահամի հետ, ասացի, որ պետք է տիտղոս նվաճենք. Եթե չստացվի չեմպիոն դառնալ, գոնե, պետք է նվաճենք գավաթը: Խաշմանյանը նշեց, որ ամեն ինչ կանենք: Խաշմանյանի օրոք 6 նոր լեգիոներ եկավ, հնարավորություններն ավելի շատ էին: Երբ պարտվեցին գավաթի եզրափակչում, Խաշմանյանին ասացի, որ ցավալի պարտություն էր, բայց ոչինչ. Մի տեղ կորցրինք, մի ուրիշ տեղ կգտնենք. մնում էր պայքարել չեմպիոնության համար: Առաջնության հերթական տուրի շրջանակում հյուրընկալվեցինք «Վանին» ու պարտվեցինք 1-3 հաշվով: Այդ խաղում պարտությունը մարզչական ամբողջ շտաբի խնդիրն էր: Լինեմ անկեղծ, օրինակ, Դավիդ Դավիդյանին ես տեսնում էի մեկնարկային կազմում, բայց շտաբը որոշել էր նրան դաշտ դուրս բերել երկրորդ խաղակեսում: Երբ Դավիդյանը մտավ խաղադաշտ, մենք պարտվում էինք արդեն 0-2 հաշվով: Հաջորդ օրը քննարկման ժամանակ ես հարցրի, թե ինչ անենք, որ պատվով դուրս գանք այս իրավիճակից: Խաշմանյանն ընդունեց իր մեղքն ու ցանկացավ հեռանալ՝ միայնակ, բայց ես որոշեցի, որ եթե գլխավոր մարզիչը հեռանում է, պետք է հեռանա նաև ամբողջ մարզչական շտաբը: Բաժանվեցինք խաղաղությամբ ու մինչ օրս պահպանում ենք լավ հարաբերությունները: Չեմպիոնության հարցում մեծ ավանդ ունի նաև Խաշմանյանը:
-Դուք մեծ ռիսկի դիմեցիք, ինչը կարող էր չարդարացվել. մարզչական փոփոխություն առաջնության ավարտից 3 տուր առաջ: Ինչպե՞ս ստացվեց, որ եկավ Գրիգորյանը:
-«Ուրարտուի» խաղի ժամանակ ինձ ասացին, որ Գրիգորյանը Երևանում է: Զանգահարեցի Գրիգորյանին, խնդրեցի 3 խաղով օգնել: Նա այստեղ չէր, բայց ասաց, որ մեկ օր անց կարող է լինել Երևանում: Գրիգորյանը եկավ, բացատրեցի իրավիճակը: Նշեցի, որ թիմը շատ լավ վիճակում է, պետք է միայն մարզական հույսն արթնացնել թիմի մեջ ու արդյունքը սպասեցնել չի տա: Գրիգորյանը եկավ, մարզական բախտը մեր կողմն էր, և 3 խաղում հաղթեցինք, որից 2-ում հաղթեցինք «Արարատ-Արմենիային», հաղթեցինք նաև գավաթի խաղարկությունում մեզ հաղթած «Արարատին»: Ես շնորհակալ եմ տղաներին, որոնք հավատացին իրենց ու հասան ցանկալի արդյունքի՝ ապացուցելով, որ այս պահին Հայաստանում ամենաուժեղն «Ալաշկերտն» է: Հույս ունեմ, որ Գրիգորյանի հետ հաջողություններ կունենանք նաև Եվրագավաթներում:
-Ի՞նչ կլիներ, եթե Ալեքսանդր Գրիգորյանը չհամաձայներ: Ո՞վ էր գլխավորելու թիմը:
-Եթե Գրիգորյանը չհամաձայներ, այդ դեպքում 3 խաղում թիմի գործողությունները կղեկավարեի ես: Կխնդրեի Սերգեյ Էրզրումյանին՝ ինձ օգնել, բայց չեմ կարող ասել, թե ինչ կլիներ:
-Երբևիցե, կրկին կհրավիրե՞ք Աբրահամ Խաշմանյանին:
-Երբեք մի ասա երբեք: Ես այդ խոսքը շատ եմ սիրում: Մենք Աբրահամի հետ շփվում ենք, ամեն ինչ լավ է: Ոչ-ոք չգիտի՝ ինչ կլինի հետո: Մյուս տարի «Ալաշկերտը» կդառնա 10 տարեկան: Դժվար է ասել, թե ինչ կլինի մեկ տարի հետո: Միգուցե, մյուս մրցաշրջանից հետո թողնեմ ֆուտբոլը, միգուցե, Աբրահամը հետ գա, միգուցե, արտասահմանից ուժեղ մասնագետ հրավիրենք: Ոչինչ չեմ կարող ասել այս պահին:
-Ի՞նչ կլիներ, եթե «Ալաշկերտը» չդառնար չեմպիոն:
-Երկար տարիներ թիմը մրցունակ է Հայաստանում և մշտապես մասնակցում է եվրագավաթներին: Գաղտնիք չէ, որ ակումբը ուներ ֆինանսական խնդիրներ: Ես ծայրահեղական եմ. Կա՛մ պետք է թիմ չունենամ, կա՛մ իմ թիմը պետք է պայքարի ամենաբարձր տեղերի համար: Դիրքեր կան, որ պետք է ուժեղացվի, հրավիրելու ենք լեգիոներների ու ավելի կուժեղացնենք կազմը: Եթե չեմպիոն չդառնայինք, խաղայինք Կոնֆերենս լիգայում, կազմը չէինք կարողանա ուժեղացնել, հնարավոր է՝ նույնիսկ թուլացվեր կազմը, բայց հիմա պատկերն այլ է. կուժեղացնենք կազմը, որպեսզի հնարավորինս լավ հանդես գանք Չեմպիոնների Լիգայում:
-Պարոն Նավոյան, ի՞նչ եք կարծում ՝ կգա՞ ժամանակ, երբ Չեմպիոնների Լիգայի որակավորման առաջին փուլում, գոնե, հույսներս չենք դնի վիճակահանության վրա, այլ պարզապես մեզ վստահ կզգանք:
-Նախորդ տարի ամենաթույլ մրցակիցն «Ալաշկերտինն» էր, բայց մեկ խաղով պարտվեցինք: Պատմությունը ցույց տվեց, որ «Ալաշկերտն» ուժեղ թիմերի հետ ուժեղ է խաղում, թույլ թիմերի հետ՝ թույլ: Այս տարի պետք է պատկերն այլ լինի, պետք է գոնե մեկ փուլ ՉԼ-ի խաղարկությունում անցնենք: Ամեն ինչ մեզնից է կախված:
-Շատ է խոսվում այն մասին, որ շատ հաճախ դուք միջամտում եք մարզիչների որոշումներին, խաղի ժամանակ փոփոխություն եք պահանջում: Ինչպե՞ս կբացատրեք Ձեր՝ չափից դուրս «խաղին մասնակցելու» փաստը:
-Ոչ մի մարզիչ չի սիրում, որ նախագահը միջամտում է իր գործերին: Միգուցե, այլ թիմերում ուրիշ է: Իմ գործը սա է: Ես լինում եմ նույնիսկ մանկապատանեկան թիմերի մարզումներին, աղջիկների թիմի խաղերին, միշտ ակումբի հետ եմ: Ես ոչ մի սիրելի ֆուտբոլիստ չունեմ: Այնպես չէ, որ ես անձնական պատճառներով ինչ-որ խաղացողի եմ առաջարկում խաղացնել: Ես առաջարկում եմ, օրինակ, այս խաղացողի փոխարեն խաղա մեկ ուրիշը: Ինչպես փորձը ցույց է տալիս, շատ հաճախ ես ճիշտ եմ լինում: Բոլոր մարզիչների հետ ես համաձայնեցրել եմ, որ իմ մասնակցությունն ունենալու եմ: Եթե անկեղծ՝ ինձ էլ հաճելի չէ, որ իջնում եմ պահեստայինների նստարանի մոտ, խորհուրդներ եմ տալիս, գնում եմ հանդերձարան: Եթե ամեն ինչ լավ լինի, ակումբի սեփականատերը կնստի իր համար հատկացված տեղում ու կվայելի խաղը: Ո՞ր մի սեփականատերը չի ցանկանում, որ իր թիմը հաղթի:
-Թիմը 2 հավասարազոր դարպասապահ ունի. Յուրչենկո ու Չանչարևիչ: Նրանք խաղում են հաջորդաբար: Այդ որոշումն ուժի մե՞ջ է, թե շրջանառվող խոսակցությունները ճիշտ են ու Յուրչենկոն կհեռանա:
-2 ուժեղ դարպասապահ ունենալը մեծ ծախսեր է պահանջում, բայց վստահ եմ, որ «ամուր» դարպաս ունեմ: 2 հավասարազոր դարպասապահ պաշտպանում է «Ալաշկերտի» դարպասը: Ունենք պայմանավորվածություն, որ անկախ ցուցադրած խաղից, Չանչարևիչն ու Յուրչենկոն խաղում են հաջորդաբար: Մենք մի ընտանիք ենք, մեզ մոտ ջերմ մթնոլորտ է, և ոչ մի խնդիր չկա:
-Այսինքն, Յուրչենկոն մնում է՞:
-Այո, Յուրչենկոն մնում է «Ալաշկերտում»:
-Խոսենք նաև կանանց թիմի մասին: Մի քանի տարի «Ալաշկերտի» աղջիկների թիմը մրցակից չուներ Հայաստանում, սակայն այս տարի «Հայասան» դարձավ չեմպիոն: Ուժեղացնելու՞ եք թիմը:
-Մեր կանանց թիմը 2 տարի եղել է Հայաստանի չեմպիոն: Խաղացել ենք Եվրոպայում, մեծ գումարներ ծախսել: Շնորհավորում եմ «Հայասային»: Ուրախ եմ, որ նման մարդ հայտնվեց, ստեղծեց մրցունակ թիմ: Կանանց ֆուտբոլում նախագահը Եվրոպայում պետք է մեծ գումարներ ծախսի, քանի որ դեռ երկար ժամանակ է պետք, որ կանանց ֆուտբոլը զարգանա Հայաստանում: Ունենք ծրագրեր, որ կարող ենք հետագայում լեգիոներներ հրավիրել, ուժեղացնել կազմը, մի քանի դիրքեր համալրման կարիք ունեն:
-Ստադիոնում փոփոխություններ կլինե՞ն:
-Խոտածածկի որակը այս պահին շատ լավն է: Ցանկանում ենք լուսավորության հարցը լուծել, որ կարողանանք երեկոյան խաղալ, քանի որ շոգ եղանակին դժվար է ցերեկը խաղալ: Նաև, այս պահին վերանորոգում ենք հանդերձարանները:
Մի լավ նորություն եմ ուզում հայտնել, «Ալաշկերտը» կարող է անվանափոխվել «Մարտունի-Ալաշկերտ» ու մեր տնային խաղերն անցկացնենք և մարզվենք Մարտունիում: Եթե ֆեդերացիան ստադիոնի հարցում աջակցի, ես ամեն ինչ կանեմ, որ «Ալաշկերտը» տեղափոխվի իմ հայրենի քաղաք: Վստահ եմ, որ խաղերի ժամանակ տրիբունաները լեփ-լեցուն կլինեն:
Վերջում ցանկանում եմ մեր մյուս թիմերին, որոնք խաղալու են Կոնֆերենս լիգայում, հաջողություն մաղթել: Ցավում եմ «Արարատ-Արմենիայի» համար, որ նման թիմը չկարողացավ եվրագավաթային ուղեգիր նվաճել, բայց ամեն ինչ առջևում է:
Արմեն Գարամյան