Ջոնաթան Բարնետը՝ հարձակվող Գարեթ Բեյլի գործակալը, պատմել է, թե ինչ խնդիրների է բախվել ուելսցի ֆուտբոլիստը Լոնդոնի «Տոտենհեմում»․
«Երբ Գարեթը միացավ «Տոտենհեմին», ես ասացի․ «Եթե դուք վստահեք նրան, թույլ տաք նրան խաղալ իր ֆուտբոլը, չասեք, թե ինչ պետք է անի, ինչ ոչ, ու նրան վերաբերվեք այնպես, ինչպես «Բարսելոնայում» և «Յուվենտուսում» վերաբերվում են Մեսսիին և Ռոնալդուին, դուք ամեն ինչ կտեսնեք։ Չեմ ասում, թե նա նույնքան լավն է, որքան արգենտինացին ու պորտուգալացին, բայց ամեն դեպքում։
Ամեն անգամ, երբ նա ստանում էր անհրաժեշտ պայմանները, մի շարք գոլեր էր խփում։ Բեյլը համաշխարհային մակարդակի խաղացող է։ Հենց նրա հանդեպ քիչ վստահությունն էր ամենամեծ սխալը, չնայած ես որևէ մեկին չեմ մեղադրում։
Արդյոք մեղադրո՞ւմ եմ Մոուրինյուին Գարեթի անկայուն ելույթների համար․ ոչ։ Նա շատ հաջողակ մարզիչ է։ Բայց Հուլիոս Կեսարը ևս շատ լավն էր, սակայն ես չեմ կարծում, թե նա կկարողանար հիանալի կերպով ղեկավարել ժամանակակից բանակը»,- Բարնետի խոսքերն է փոխանցում Daily Mail-ը։
Ապրիլի 19-ին «Տոտենհեմը» հայտարարեց Ժոզե Մոուրինյուի պաշտոնանկության մասին։ Հաջորդ մրցաշրջանից 58-ամյա մասնագետը կգլխավորի իտալական «Ռոման»։
Գարեթ Բեյլը 2020/2021 մրցաշրջանից է հանդես գալիս «Տոտենհեմում»՝ վարձակալության հիմունքներով։ Նրա պայմանագիրը պատկանում է «Ռեալին» և ուժի մեջ է մինչև 2022 թվականի հունիսի 30-ը։