ԱՊԼ-ի ղեկավարությունը լիգայի բոլոր մրցավարներին կոչ է արել Ռամադանի ընթացքում կայանալիք երեկոյան խաղերի ժամանակ երկու թիմերի ավագների հետ քննարկել մուսուլման ֆուտբոլիստների կողմից սնունդի և ջրի օգտագործման հարցը: Այս մասին հայտնում է Sky Sports-ը:
Մրցավարներին կոչ է արվել թիմերի ավագների հետ համաձայնեցնել խաղի ընթացքում որոշակի դադարի հնարավորությունը, որպեսզի մուսուլման խաղացողները կարողանան անհրաժեշտ ժամանակ սնունդ կամ ջուր ընդունել: ԱՊԼ-ն մտադիր է ապահովել, որ յուրաքանչյուր մուսուլման խաղացող Ռամադանի ամսում երեկոյան խաղերի ժամանակ հնարավորություն ունենա էներգետիկ որևէ ըմպելիք խմելու:
Երկուշաբթի երեկոյան «Լեսթերն» ու «Քրիսթալ Փելասը» խաղից առաջ համաձայնության էին եկել մրցավար Գրեմ Սքոթի հետ, որ հանդիպման մեկնարկից 30 րոպե անց իրենց խաղում կլինի դադար, որպեսզի ֆուտբոլիստներ Ուեսլե Ֆոֆանան ու Շեյհու Կույատեն կարողանան ընդհատել Ռամադանի ծեսը:
Հյուրերի դարպասապահ Վիսենտե Գուաիտան հետաձգեց դարպասից կատարելիք հարվածը, որպեսզի ֆուտբոլիստները խաղադաշտի մյուս կողմում էներգետիկ ըմպելիք ընդունեն:
Պրեմիեր-լիգայի կանոնադրությունը միշտ էլ թույլ է տվել խաղի ընթացքում դադար իրականացնել, եթե երկու թիմերի ավագներն այդ մասին համաձայնության են գալիս, սակայն լիգայի ղեկավարությունը հիմա ցանկանում է, որ դա դառնա նախախաղյա ստանդարտ քննարկման առարկա, ինչպես օրինակ բանակցություններն այն մասին, թե արդյոք երկու կողմն էլ խաղի մեկնարկից առաջ ծնկի կգա՞:
Հաջորդ խաղը, որտեղ սա տեղի կունենա, կլինի ԱՊԼ-ի 34-րդ տուրի՝ «Սաութհեմփթոնի» և «Լեսթերի» միջև՝ ապրիլի 30-ին նախատեսված հանդիպումը: