Բասկետբոլի VBET Եվրասիական լիգայի եզրափակչում Բեյրութը ներկայացնող «Ալ Ռիադի» ակումբը, ինչպես հայտնի է, 76։75 հաշվով առավելության է հասել «Վահագնի Սիթիի» նկատմամբ և նվաճել չեմպիոնական տիտղոսը։
Հանդիպման ամենաարդյունավետ խաղացող է դարձել Թադե Քեշիշյանը, որը «Վահագնի Սիթիի» կազմում վաստակել է 20 միավոր։
«Բարդ հանդիպում էր ու ցավալի պարտություն։ Շնորհակալ եմ «Վահագնի Սիթիի» երկրպագուներին աջակցության համար։ Դուք իմ թիմի և ինձ համար տարին շատ առանձնանահատուկ դարձրիք»,- գրել է Քեշիշյանը։
Հայաստանի բասկետբոլի Ա լիգայի կանոնավոր առաջնության նախագահ Արա Պողոսյանն ասում է՝ չնայած բոլորս էլ ցանկանում էինք, որ «Վահագնի Սիթին» նվաճեր չեմպիոնությունը, ամեն դեպքում լիբանանյան թիմը միանգամայն արժանի էր ոսկե մեդալներին ու Գավաթին․
«Իմ տպավորությունները կվերլուծեմ մի փոքր ավելի ուշ, քանի որ հիմնական բեռն ընկել էր մեր թիմի ու ինձ վրա, թաքցնելու բան չկա։
Կազմակերպչական առումով շատ դժվարությունների միջով անցանք, բայց շատ հետաքրքիր առաջնություն ունեցանք, շատ երջանիկ եմ, որ այսպիսի պայքար եղավ։ Բոլորս կուզենայինք, որ «Վահագնի Սիթին» չեմպիոն դառնար, ամբողջ դահլիճը փորձում էր օգնել «Վահագնի Սիթիին», բայց ամեն դեպքում ես համարում եմ, որ «Ալ-Ռիյադին» արժանի էր չեմպիոնության։ Շնորհավորում եմ այս թիմին ու Բեյրութին, տեսաք՝ նրանք մինչև վերջ պայքարեցին, ամեն գնդակի համար պայքար էին մղում և ունենալով շատ ավելի թույլ կազմ՝ կարողացան հաղթել ու չեմպիոն դառնալ։
Իհարկե, շատ կցանկանայինք, որ «Վահագնի Սիթին» դառնար չեմպիոն, բայց սա էլ փորձ էր նրանց համար»,- ասում է Արա Պողոսյանը։
Թե՛ «Դվինը», թե՛ «Վահագնի Սիթին» նորեկ էին Եվրասիական լիգայում, Արա Պողոսյանն ասում է՝ այս երկու թիմերն էլ հաջորդ տարվա համար պետք է վերանայեն իրենց կազմը․
«Ամեն խաղ թեկուզ ներքին առաջնության, փորձ է, իսկ միջազգային խաղերը եռապատիկ, քառապատիկ անգամ ավելի մեծ փորձ է։ Նրանք պետք է հասկանան, որ մրցեցին շատ կազմակերպված թիմի հետ, որը ցույց տվեց իսկական բասկետբոլ։ «Դվինն» էլ, «Վահագնի Սիթին» էլ պետք է դա հասկանա։
Կարծում եմ՝ սա մեծ փորձ էր մեր նորեկ թիմերի համար՝ թե՛ «Դվինը», թե՛ «Վահագնի Սիթին» նորեկ էին, ու հաջորդ տարիներին արդեն երևի պետք է մտածեն կազմն այլ կերպ ձևավորելու մասին՝ շեշտը դնելով հայազգի խաղացողների վրա։ Տեսաք՝ «Ալ-Ռիյադին» առանց ամերիկացի խաղացողների էլ շատ կազմակերպված ու լավ խաղ ցուցադրեց»,- ընդգծում է Արա Պողոսյանը։