Բասկետբոլի VBET Եվրասիական լիգայի եզրափակչում Բեյրութը ներկայացնող «Ալ Ռիադի» ակումբը, ինչպես հայտնի է, 76։75 հաշվով առավելության է հասել «Վահագնի Սիթիի» նկատմամբ և նվաճել չեմպիոնական տիտղոսը։
Լիբանանյան թիմը գրեթե հավասար ու դրամատիկ պայքարում ընդամենը մեկ միավորի առավելությամբ է հաղթանակի հասել․
Prince of Al Riyadi did it again 💪🏼💙💛 @sobhikablawi pic.twitter.com/gWYF730HSl
— Al RIYADI CLUB (@AlRiyadiClub) March 29, 2021
«Ալ Ռիադիի» կազմում հանդես է գալիս 31-ամյա հայազգի բասկետբոլիստ Հայկ Գյոկչյանը․ պրոֆեսիոնալ բասկետբոլիստն ArmSport-ի հետ զրույցում նշում է՝ իր համար երազանք էր հայրենիքում խաղալու հնարավորություն ունենալը․
«Ինձ համար սա հիանալի փորձառություն էր։ Երազում էի մի օր իմ հայրենիքում խաղալու հնարավորության մասին։
Շատ բարդ հանդիպում էր, «Վահագնի Սիթին» հիանալի թիմ ուներ։ Երկու անգամ խաղացինք նրանց հետ, երկու անգամն էլ հաղթեցինք ընդամենը մեկ միավորի առավելությամբ։ Մեզ համար հատկապես բարդ էր, քանի որ 1,5 տարի չէինք խաղացել և ընդամենը երկու շաբաթ ունեինք այս մրցաշարին նախապատրաստվելու համար։ Պետք է նշեմ, որ Հայաստանում բասկետբոլի մակարդակը մեզ շատ զարմացրեց, այն ավելի բարձր էր, քան մենք սպասում էինք»,- խոստովանում է Հայկ Գյոկչյանը։
Ասում է՝ իր ոչ հայ թիմակիցները ևս շատ են սիրել մեր երկիրը․
«Հիանալի մրցաշար էր ու բոլորը այն շատ սիրեցին։ Սիրեցին նաև մեր երկիրը ու շատ կցանկանան ապագայում մի օր վերադառնալ։ Հուսով եմ՝ մակարդակը կշարունակի աճ գրանցել ու այս մրցաշարը մենք մի օր կվերածենք մեծ իրադարձության։ Առհասարակ, շատ ուրախ եմ տեսնել, որ Հայաստանում այս մարզաձևը տարեցտարի զարգացում է ապրում։ Այս երկիրը մեծ պոտենցիալ ունի, եթե մարզաձևին բավականաչափ ուշադրություն դարձվի»։
View this post on Instagram
Հայկ Գյոկչյանի հայրն անվանի մասնագետ Տիգրան Գյոկչյանն է, որը հանդիսանում է նաև «Դվին» ակումբի գլխավոր մարզիչը։ Հայկը խոստովանում է՝ կցանկանար եզրափակչում հենց «Դվինի» հետ մրցել։
«Եզրափակչում կնախընտրեի հենց նրա թիմի դեմ խաղալ։ Մենք երկուսս էլ պրոֆեսիոնալներ ենք, բասկետբոլային կորտում մոռանում ենք, որ հայր ու որդի ենք։ Թե՛ ես, թե՛ նա ամեն ինչ անում ենք մեր թիմերի հետ հաղթանակի հասնելու համար։ Առաջին անգամը չէ, որ խաղում էինք իրար դեմ»,- ասում է Հայկ Գյոկչյանը՝ ամփոփելով Եվրասիական լիգայի կիսաեզրափակիչը, որում լիբանանյան թիմն առավելության էր հասել հենց «Դվինի» նկատմամբ։
Հայկ Գյոկչյանը բասկետբոլով սկսել է զբաղվել մանկուց՝ իր առջև ունենալով հոր օրինակը․
«Խաղում եմ դեռ երեխա ժամանակվանից՝ նայելով ,թե ինչպես է հայրս խաղում։ Նա Հայաստանի լավագույն բասկետբոլիստներից էր ու որպես լեգիոներ՝ խաղում էր Լիբանանում։ Ես դպրոց ու համալսարան հաճախել եմ ԱՄՆ-ում՝ 7 տարի, որտեղ էլ խաղացել եմ բասկետբոլ։
2013 թվականից խաղում եմ Լիբանանում՝ արդեն պրոֆեսիոնալ մակարդակում։ Վերջին երկու տարում հաղթել եմ Լիբանանի լիգայում՝ նախ «Հոմենեթմենի», ապա նաև «Ռիադիի» հետ։ Երազանքս ՖԻԲԱ-ի աշխարհի Գավաթին մասնակցելն է»,- անկեղծանում է Հայկը։
Ասում է՝ բասկետբոլն իրենց կյանքն է․
«Բասկետբոլը բնորոշում է մեր կյանքը։ Այն մեր կիրքն է, մեր աշխատանքը, մեր կյանքը։ Այն իմաստ է տալիս այն ամենին, ինչ մենք անում ենք»։
Հիշեցնենք՝ Հայկ Գյոկչյանը ճանաչվել է Բասկետբոլի VBET Եվրասիական լիգայի լավագույն ծանր հարձակվող:
Եվրասիական լիգային մասնակցում էին 5 թիմեր Հայաստանից, Ռուսաստանից ու Լիբանանից: Համավարակի պատճառով մրցաշարում իրենց մասնակցությունը չունեցան Բելառուսի, Իրանի և Ղազախստանի թիմերը: