Այսօր կկայանան Աշխարհի ակումբային առաջնության եզրափակիչ և երրորդ տեղի համար հանդիպումները։ Կմրցեն 4 աշխարհամասերի ուժեղագույն ակումբները։
Երրորդ տեղի համար խաղում ուժեղագույնին կպարզեն Աֆրիկայի լավագույն ակումբը՝ եգիպտական «Ալ-Ահլին», և Լիբերտադորեսի գավաթի (Հարավային Ամերիկա) նորաթուխ դափնեկիրը՝ բրազիլական «Պալմեյրասը»։ Հանդիպումը կկայանա Երևանի ժամանակով 19։00-ին։
Իսկ ահա եզրափակչում կհանդիպեն Չեմպիոնների լիգայի ներկայիս տիտղոսակիրը՝ Մյունխենի «Բավարիան» և հյուսիսամերիկյան ՉԼ դափնեկիրը՝ մեքսիկական «Տիգրեսը»։ Այս խաղի մեկնարկը՝ 23։00-ին։
🌎 Եվրոպա՞, թե՝ Հյուսիսային Ամերիկա
Թե ո՞վ կզբաղեցնի մրցաշարում երրորդ տեղը, անկեղծ լինենք, առանձնապես քչերին է հետաքրքրում (բացի ակումբների երկրպագուներից)։ Նաև այն գրեթե ոչինչ չի տալիս տվյալ ակումբներին՝ բացի վիճակագրական ցուցանիշներից (պլյուս՝ մի քիչ գումար), և ֆորմալ այն կրում է ավելի շատ ընկերական հանդիպան բնույթ։ Ո՞ր թիմը կդառանա երրորդ մրցանակակիր․ շատերդ կարող եք չհամաձայնել, բայց իմ կարծիքով այս խաղում շանսերը հավասար են․ բրազիլական թիմը, չնայած վերջերս դարձավ իր աշխարհամասի ակումբային չեմպիոն, բավականին ոչ կայուն է հանդես գալիս, իսկ աֆրիկյան ուժեղագույն թիմը, ընդհակառակը՝ աչքի է ընկնում կայունությամբ և հնարավորության դեպքում կարող է զգալի տհաճություններ պարգևել «Պալմեյրասին»։ Ինչպես օրերս ասել էր Մյուլլերը՝ «Ալ-Ահլին դա աֆրիկյան «Բավարիան» է»․․․
Եթե վերը նշված դիմակայությունն ընդամենը այսօրվա խաղային օրվա դեսերտն է, ապա եզրափակիչ հանդիպումը չի կարելի այդպիսին համարել․ այն ֆուտբոլային աշխարհի այսօրվա գլխավոր և «ամենահամեղ» ուտեստն է։ Օրերս մյունխենյան գրանդի գլխավոր մարզիչ Հանդ Դիտեր Ֆլիկը ասել էր, որ շատ է ցանկանում նվաճել Աշխարհի ակումբային առաջնության չեմպիոնի տիտղոսը և իր թիմն արժանիորեն է հասել եզրափակիչ։
Գերմանիայի Չեմպիոն, գավաթակիր, սուպերգավաթակիր, Չեմպիոնների լիգայի դափնեկիր, Եվրոպայի (ՈՒԵՖԱ) սուպերգավաթակիր․․․ ամբողջական հավաքածուի համար պակասում է միայն Ակումբային ԱԱ-ի չեմպիոնի տիտղոսը։ Եվ դա շատ կարևոր խթան է բավարական թիմի համար․․․
🐯 Հյուսիսամերկյան «վագրերը»
Եթե «Բավարիային» առանձնապես ներկայացնելու կարիք չկա, բոլորդ էլ շատ լավ գիտեք՝ ինչ է իրենից ներկայացնում Ֆլիկի ավազակախումբը, ապա մեքսիկական թիմը ոչ բոլոր ֆուտբոլասերներին է քաջ ծանոթ։ Մինչ եզրափակչի մասնակից դառնալը «Տիգրեսը» նախ հաղթահարեց հարավկորեական «Ուլսանի» արգելքը՝ ֆրանսիացի հարձակվող Ժինյակի դուբլի շնորհիվ, ապա կիսաեզրափակչում նույն Ժինյակի ճշգրիտ հարվածի շնորհիվ նվազագույն հաշվով հաղթանակ տարավ «Պալմեյրասի» նկատմամբ։ «Բավարիան» իր հերթին Լևանդովսկու դուբլի շնորհիվ կիսաեզրափակչում հաղթեց «Ալ Ահլիին»։
Եթե համեմատենք «Բավարիայի» հետ՝ «Տիգրեսը» գտնվում է լրիվ այլ քաշային կարգում․ գերմանական գրանդի կազմի ամբողջ արժեքը գնահատվում է 829 մլն եվրո, իսկ մեքսիկական ակումբինը՝ 59,4 մլն եվրո։ Այսինքն, մոտ 15 անգամ պակաս․ տպավորիչ է։ «Բավարիայի» կազմում ամենաթանկարժեք ֆուտբոլիստը Յոսուա Կիմիխն է՝ 90 մլն եվրո, այն դեպքում, որ «վագրերի» կազմում առաջատարն այդ ցուցանիշով ուրուգվայցի հարձակվողական ոճի կիսապաշտպան Լեոնարդո Ֆերնանդեսն է՝ 7,5 մլն եվրո։
«Տիգրեսի» ֆուտբոլիստները հիմնականում աչքի են ընկնում ֆիզիկական լավ պատրաստվածությամբ։ Ռիկարդո Ֆերետիի գլխավորությամբ «վագրերը» 2020թ դեկտեմբերին դարձան ԿՈՆԿԱԿԱՖ-ի Չեմպիոնների լիգայի հաղթող՝ եզրափակչում 2։1 հաշվով հաղթելով ամերիկյան «Լոս Անջելեսին»։ Այդպիսով նրանք ձեռք են բերել Աշխարհի ԱԱ-ին մասնակցելու ուղեգիր։
Թիմը համալրված է հիմնականում փորձառու ֆուտբոլիստներով, որոնցից կարելի է առանձնացնել Մեքսիկայի հավաքականի պաշտպան Կարլոս Սալսեդոյին, ժամանակին ՌՊԼ-ում հանդես եկած բրազիլացի կիսապաշտպան Ռաֆայել Կարիոկային, պարագվայցի հարձակվող Կարլոս Գոնսալեսին, և իհարկե, հավանաբար ամենահայտնի ֆուտբոլիստը՝ ֆրանսիացի հարձակվող Անդրե Պիեր Ժինյակը, ով ժամանակին հանդես է եկել «Մարսելում»։
Ժինյակը իր թիմի գլխավոր ռմբարկուն է ակումբային ԱԱ-ում՝ փաստացի խփելով իր թիմի բոլոր գնդակները այս մրցաշարում։ Այդ առումով մեզ սպասվում է ևս մեկ հետաքրքիր դիմակայություն․ Լևանդովսկի՞, թե՝ Ժինյակ․․․ Ո՞վ կդառնա մրցաշարի լավագույն ռմբարկուն։
Մեքսիկայի 7-ակի չեմպիոնի համար, հյուսիսամերիկյան ՉԼ-ն հաղթելուց հետո, այսօրվա հաղթանակը կարող է բերել թիմին միջազգային առաջին տիտղոսը, իսկ «Բավարիայի» համար այն կլինի պարզապես հերթական տիտղոսը մրցաշրջանում․․․
Վար Բաբայան
