Հունվարի 15-ից Հայաստանի ռաջատար ձյուդոիստները Ծաղկաձորում 14-օրյա ուսումնամարզական հավաք կանցկացնեն։ Թիմի գլխավոր մարզիչ Հովհաննես Դավթյանը ՀԱՕԿ լրատվականի հետ զրույցում հայտնել է, որ մարզումներում կընդգրկվեն 16 մարզիկներ։
Շեշտը դրվելու է տղաների ընդհանուր ֆիզպատրաստականության որակների բարելավմանը։ Նոսր թթվածնային օդի պայմաններում հեշտ չեն լինելու մարզումները։ Դրանք օգտակար կլինեն հետագայում, երբ մարզական միջոցառումները կշարունակվեն համեմատաբար ցածրադիր գոտիներում։
Նպատակ կա տեխնիկատակտիկական հատկանիշները հնարավորինս բարձրացնել նախատեսված երկրորդ հավաքի ընթացքում։ Փետրվարի 18-ին Թել-Ավիվում կմեկնարկի միջազգային օլիմպիական վարկանիշային մրցաշար։ Տատամի կելնեն առավել լավ մարզավիճակի հասած ձյուդոիստները։
Մրցաշրջանը հագեցած կլինի ուսումնամարզական հավաքներով և վարկանիշային մրցաշարերով։ Ցանկություն կա մասնակցել ու հաջողության հասնել ամռանը կայանալիք Տոկիոյի օլիմպիական խաղերում: