VBET Հայաստանի գավաթի 2020/21 խաղարկությանը չի մասնակցի Առաջին խմբում հանդես եկող «Լեռնային Արցախը»: Հայկական երկրորդ Հանրապետությունը ներկայացնող թիմը նախորդ տարի նույնպես բաց էր թողել գավաթի խաղարկությունը՝ պատճառն այն էր, որ թիմը վերջին պահին էր որոշել մասնակցել Առաջին խմբի առաջնությանը, իսկ գավաթի խաղարկությանը մասնակցելու հայտերի ընդունման ժամկետն արդեն ավարտված էր: Ակումբի տնօրեն Մհեր Ավանեսյանի խոսքով այս տարի գավաթի խաղարկությանը չմասնակցելու պատճառը կորոնավիրուսն է.
«Մեր չմասնակցությունն առաջին հերթին կապված է կորոնավիրուսի հետ: Նախնական պայմանավորվածություն կար, որ թիմի Հայաստան գնալ-գալը կարող է վտանգավոր լինել՝ ինչքան քիչ հատվի սահմանը, այնքան ցածր կլինի կորոնավիրուսը Արցախ բերելու հավանականությունը: Վիրուսի թուլացումից հետո որոշեցինք, որ կարելի է մասնակցել, բայց արդեն հայտերի ընդունման ժամկետն ավարտվել էր: Մի պահ նույնիսկ առաջնության մասնակցությունն էլ էր հարցականի տակ՝ նույն կորոնավիրուսի պատճառով: Հաջորդ տարվա համար արդեն պայմանավորվածություն կա, որ մասնակցելու ենք անպայման»,-ասաց ակումբի տնօրենը:
Առաջին խմբի նախորդ մրցաշրջանում, որը դադարեցվեց առաջնության ավարտից 4 տուր առաջ, Արցախի թիմը զբաղեցնում էր մրցաշարային աղյուսակի ստորին հատվածում: Այս տարի թիմի առջև խնդիր է դրված դուրս գալ Պրեմիեր լիգա.
«Թիմի առաջ խնդիր է դրված Պրեմիեր լիգայի ուղեգիր ձեռք բերելու: Մենք խաղում ենք հիմնականում Լեռնային Արցախի թիմի կադրերով, ունենք 5 լեգիոներ թիմում: Այս տարի ունենք 2 նորեկ: Տնային խաղերն անցկացնելու ենք Էջմիածնի ակադեմիայում, բայց եթե կորոնավիրուսի հետ կապված սահմանափակումներն անցնեն, խաղալու ենք Սիսիանում, ինչպես նախորդ տարի»,-ասաց Ավանեսյանը:
Այնուամենայնիվ, ակումբի տնօրենի համար մտահոգության առիթ է այն, որ նույնիսկ Պրեմիեր լիգա դուրս գալու դեպքում թիմը չի կարողանա տնային խաղերն անցկացնել Արցախում՝ սեփական երկրպագուների աջակցության ներքո.
«Եթե դուրս գանք Բարձրագույն լիգա, չենք կարող տնային խաղերն անցկացնել Արցախում, դա արդեն ուրիշ խնդիր է, և հիմա չենք մտածում այդ մասին: Աշխատում ենք Պրեմիեր լիգայի ուղեգիր ձեռք բերել, հետո նոր մտածենք այդ ուղությամբ: Միակ խնդիրն այն է, որ զրկվում ենք մեր երկրպագուների ներկայությունից, թե չէ ոչ մի այլ խնդիրներ չունենք՝ ֆինանսական կամ տեխնիկական»,-ասաց Ավանեսյանը:
Երվանդ ՀԱԿՈԲՅԱՆ
